DILI, 22 agostu 2023 (TATOLI) – Ministru Defeza Donaciano do Rosário da Costa Gomes Pedro Klamar Fuik, hateten Governu komprometidu hodi fó importánsia ba dezenvolvimentu Autoridade Nasionál Marítima (ANM).
Nia dehan, Autoridade Marítima Nasionál sai hanesan prioridade nasionál ba IX Governu nian, tanba Timor-Leste iha ona definisaun fronteira marítima, tanba ne’e, Governu ka Estadu presiza ezerse autoridade ne’ebé maka iha espasu juridisaun rasik.
“Agora ida ne’e tama iha Governu nian programa, atu reforsa autoridade ida ne’e mak tinan ne’e ita hahú lejislasaun no lejislasaun prontu hotu ona mak tinan oin ita komesa tau iha prátika no asaun ne’ebé maka nesesáriu para bele fortifika ita-nia ezersísiu Autoridade Nasionál Marítima liuliu oinsá atu halo kontrolu ba ita-nian tasi”, Pedro Klamar Fuik hateten ba TATOLI iha Parlamentu Nasionál, tersa, ohin.
“Tasi presiza autoridade ida ita hanaran Autoridade Nasionál Marítima ne’ebé bele ezerse autoridade Estadu nian iha ita nian tasi, atu bele halo salva guarda ba rikeza ka rekursu ne’ebé mak ita iha liuliu iha tasi”, nia adianta.
Tanba ne’e, Governu dasia deskreve iha nian programa ba tinan lima sei reforsa Autoridade Nasionál Marítima.
Nia dehan, atu fortifika Autoridade ida ne’e, Ministériu hirak ne’ebé hola parte hanesan Ministériu Agrikultura, Ministériu Interiór liuhosi Polísia Nasionál Timor-Leste, Ministériu Transporte Komunikasaun no Ministériu Finansas liuhosi Autoridade Aduaneiru (AA/ Alfándega) no Ministériu Defeza ne’ebé sai hanesan kordenadór ba autoridade ida ne’e sei ezekuta programa Governu dasia nian hodi reforsa Autoridade Nasionál Marítima atu bele halo kontrolu iha tasi Timor bele la’o ho di’ak.
“Estadu Timor-Leste bele ezekuta nia autoridade iha tasi ho forma ida efikasia no efisiente, signifika katak ita tenke hatudu ita nia autoridade iha tasi”, nia dehan.
Kona-ba meius atu dezenvolve ANM hodi kontrola tasi Timor, Ministru Defeza Pedro Klamar Fuik hateten, Governu sei tau iha Orsamentu Jerál Estadu (OJE) 2024.
“Ita sei prevé osan ba ita-nia forsa armada iha komponente tolu ne’e inklui Autoridade Nasionál Marítima ne’e rasik, oinsá atu dezenvolve. Agora ita diskute orsamentu retifikativu, orsamentu tinan oin ita sei haree”, nia afirma.
Jornalista: Natalino Costa
Editór : Zezito Silva
