DILI, 23 agostu 2023 (TATOLI)–Prezidente Autoridade Munisipiu Dili (AMD), Guilhermina Filomena Oliveira, la tolera no alerta ba komunidade iha Dili ne’ebé faan sasán iha espasu públiku.
“Aproveite opurtunidade atu hateten ba komunidade ne’ebé okupa espasu públiku katak to’o loron 01 setembru, bainhira ami tuun laiha konsensu ona tanba ita fó tempu besik fulan ida ona no ami mós observa direta iha sidade Dili sira-ne’e kuaze loro-loron. Tanba ne’e, dala ida tan, hahú 01 setembru ne’e espasu públiku ne’ebé faan hanesan estrada ninin, trotoar, tantu iha loza xina sira-nia oin ne’e, tenke husik mamuk ona. Ami laiha konsensu no ami tun ami book de’it ona,” AMD ne’e hateten ba jornalista sira, hafoin asina MoU ho UCCLA, AEMTL iha salaun AMD, Matadouro, kuarta ne’e.
Kona-ba sansaun, nia esplika, iha dekretu-lei númeru 33/2008 ne’e hateten kontra ordensaun públiku, entaun kuandu la kumpre regra mak sei aplika koima mínimu $5 no másimu $500.
“Se ami aplika koima mak sei iha tan problema, entaun ami husu kooperasaun atu kontribui ba sidade organizadu. Maibé, kuandu la kumpre no ami identifika dala rua-tolu ba leten mak ami sei aplika koima. Munisípiu Dili, kapitál nasaun nian mak AMD iha obrigasaun no dever atu organiza Dili sai Dili moos no matak. No, ho kestaun ne’e negosiante sira preokupa hodi hato’o ba Prezidente Repúblika maibé ida-ne’e la’ós problema. No, ha’u konsiente katak Governu tenke kria kondisaun kompletu ho nia fasilidade,” nia dehan.
Maibé, nia hateten, fasilidade ne’ebé Governu prepara ona iha merkadu hanesan Taibesi no Manleuana ne’e agora la uza, nune’e fó ona tempu temporária maibé sira mós tenke hahú ona atu koopera ho autoridade munisípiu Dili.
Ho ne’e, nia husu ba komunidade tenke halo separasaun merkadu ho espasu públiku, nune’e Dili ne’e haree organizadu no furak.
Agora, buat ne’ebé mak ADM haree no nota ne’e negosiante la’ós faan de’it maibé haki’ak animál hanesan manu no fahi sira.
Ho Dili ne’ebé nia kondisaun la organizadu mak iha IX Governu Konstitusionál kria Sekretáriu Estadu Asuntu Toponímia no Organizasaun Urbana hodi hamriik iha AMD nia kotuk, nune’e halo mudansa no halo Dili tenke organizadu.
“Ami husu ba sira katak sira bele uza daudaun fasilidade iha espasu públiku ho temporária, tanba por enkuantu ami sei tolera no ami rekoñese katak fasilidade mós laiha. Tanba ne’e, mak ita prepara hela rai iha ho medida 2.000 kuadradu iha Manleuana no sei akumula negosiante iha espasu públiku sira,” nia dehan.
Husu kona-ba orsamentu atu konstrui merkadu foun, nia hatán, labele adianta uluk lai tanba seidauk hatene montante orsamentu fiksu ba konstrusaun merkadu, maibé atu dehan loloos sei konstrui iha tinan oin.
Seguransa iha jardin kapitál Dili nian
Prezidente autoridade munisípiu Dili hateten, agora atu ko’alia kona-ba seguransa ne’e ema hotu iha responsabilidade ba nia aan rasik bainhira uza fasilidade iha fatin públiku hanesan haris fatin no bee-moos ne’e, tanba iha lei inan mós hateten responsabilidade ba sidadaun ida-idak nia aan rasik.
“Agora ita atu haree ba jardin ne’ebé daudaun ne’e iha hela prosesu rehabilitasaun ne’e, husu ba ita hotu atu iha responsabilidade bainhira uza. Seluk fali, ami husu ba autoridade komunitária atu bele ajuda, to’o tempu autoridade komunitária ho Konsellu suku nian halo intervensaun,” nia hateten.
Nia haforsa tan katak to’o 01 setembru 2023, espasu públiku tenke husik mamuk no laiha ema ida mak faan sasán iha espasu públiku.
“Ita hakarak hotu-hotu kontribui ba Dili organizadu no presiza iha kooperasaun no husu ita hotu sai na’in ba sidade Dili ne’e. Loos, iha direitu maibé dever ho obrigasaun iha ne’ebé,” nia dehan.
Jornalista : Osória Marques
Editór : Cancio Ximenes
