STAE Covalima identifika sidadaun seidauk submete dokumentu ba vaga PSAS-PSAA
COVALIMA, 23 agostu 2023 (TATOLI)—Sekretáriu Tékniku Administrasaun Eleitorál (STAE) Covalima identifika sidadaun hosi aldeia 55 seidauk submete dukumentu atu konkorre iha vaga ba Pesoál STAE Apoiu Suku (PSAS) no Pesoál STAE Apoiu Aldeia (PSAA) iha munisípiu Covalima.
Notísia Relevante: STAE Covalima rekruta PSAS-PSAA 326 ba eleisaun xefe suku
“Ita sei halo estensaun oráriu rekrutamentu ba Pesoál STAE Apoiu Suku (PSAS) no Pesoál STAE Apoiu Aldeia (PSAA) ne’ebé konkorente hosi aldeia 55 seidauk submete dokumentu hodi kompete iha vaga ne’ebé fó sai hosi STAE Covalima hodi prepara ba eleisaun xefe Suku,” Diretór STAE munisípiu Covalima, Francisco Gusmão, hato’o ba Agência Tatoli, iha nia kna’ar fatin, Kampung Baru, kuarta ne’e.
STAE hala’o estensaun oráriu rekrutamentu tanba konkorente hosi aldeia 55 seidauk submete dokumentu, nune’e STAE Covalima uza meiu hodi pasa informasaun ba administradór postu administrativu sira atu rekolla dokumentu sira.
Hafoin administradór postu administrativu sira rekola dokumentu mak iha 25 agostu tinan ne’e, STAE sei foti dokumentu hosi postu administrative, nune’e atu halo selesaun ba dokumentu hosi konkorrente ne’ebé konkorre ba vaga PSAS no PSAA.
“Preparasaun STAE ba eleisaun lideransa komunitária kada suku no aldeia ema nain-ida submete sira nia dokumentu oinsa mak bele halo selesaun ,tanba ne’e mak ita halo estensaun rekrutamentu ba vaga tanba agora dadaun la prense kritéria ita atu halo avaliasaun ba dokumentu no teste eskrita”,nia informa.
Maske STAE pasa informasaun ba administradór postu administrativu sira nafatin sidadaun sira ladún interrese submete sira-nia dokumentu atu konkorre vaga hosi STAE, nune’e STAE sei buka meiu seluk.
Ita sei buka meiuseluk hodi bolu fali sidadaun ne’ebé mak iha esperïénsia kona-ba eleisaun hanesan brigada sira, nune’e ita bele enkontru hon sira, nune’e bele organiza eleisaun apoiu suku no aldeia tanba sidadaun Covalima ladún interrese atu konkorre vaga ne’ebé publika hosi STAE,” nia hateten.
Tuir planu, preparasaun atu hala’o eleisaun Xefe Suku, STAE Covalima rekruta Pesoál STAE Apoiu Suku no Pesoál STAE Apoiu Aldeia (SPAA) hamutuk 326 ba eleisuan xefe suku ne’ebé sei realiza fulan-outubru tinan ida-ne’e.
Hosi ne’e, pesoál STAE Apoiu Aldeia koloka ema na’in-296, tanba kada aldeia sei destaka ema na’in-rua (2) no ema na’in-30 koloka ba suku ne’e ema na’in-ida (1).
Prosesu rekrutamentu, STAE hahú anúnsia vaga no kandidatu sira submete ona dokumentu PSAS-PSAA iha loron 31 fulan-jullu tinan 2023 sei ramata iha loron 11 fulan-agostu tinan 2023, maibé agora sei halo estensaun to’o loron 25 fulan-agostu ne’e.
Antes ne’e, STAE Covalima rejista totál eleitór mai hosi postu administrativu, Fatululik, Fatumea, Fohorem, Fatumea, Tilomar, Maucatar, Zumalai no Suai ne’e, hamutuk 49,469 ne’ebé ho nia suku hamutuk 30 no aldeia iha 148.
Jornalista : Celestina Teles
Editór : Cancio Ximenes
