Covalima propoin $9,728,104 iha OJE 2024 hodi implementa programa prióridade 11
COVALIMA, 24 agostu 2023 (TATOLI)–Autoridade Covalima liuhosi reuniaun konsellu Konsultivu Munisipál halo diskusaun no aprova Orsamentu Jerál Estadu tinan 2024 ne’e, munisípiu Covalima propoin $9,728,104 hodi implementa programa prióridade 11, sub programa 34 ho atividade 84.
Enkontru konsellu konsultivu Munisipál ne’e lidera hosi Administradór Covalima, Francisco de Andrade, akompañadu hosi Sekretáriu Administrasaun Munisípiu Covalima, Francisco de Jesus Alves,
“Bazeia ba rezultadu enkontru konsellu konsultivu munisipál diskute no aprova orsamentu jerál Estadu tinan 2024 liuhosi votasaun ne’ebe aprova ho votu uninimidade ba orsamentu munisípiu Covalima hamutuk $9,728,104,” Administradór Covalima, Francisco de Andrade, hateten hafoin anúnsia rezultadu votasaun iha salaun AMC, Sukaer Laran, kinta ne’e.
Orsamentu Jerál Estadu 2024, Covalima propoin $9,728,104 ne’e, prevee ba saláriu no vensimentu $2,551,921, bens no korrente $496,036, servisu korrente $931,401, rendas $8.000, tranferénsia korrente $2,664,417, bens no kapitál $3,031,578.
Programa prióridade 11 ne’ebé sei implementa iha tinan 2024 mak hanesan estrada no ponte, dezentendementu rurál no urbana, seguransa nasionál, boa-governasaun, asesu justisa, agrikultura, saúde, edukasaun no formasaun, igualdade jéneru no inkluzaun sosiál, água saneamentu no turizmu.
Jornalista : Celestina Teles
Editór : Cancio Ximenes
