DILI, 23 agostu 2023 (TATOLI) – Diretór Fundasaun Mahein (FM), Nelson Belo, husu ba Governu Timor-Leste atu haforsa relasaun bilaterál liuhosi mekanismu harii relasaun kordenada ho nasaun Indonézia no Austrália hodi halo vijilánsia ho objetivu atu kontrola atividade peska ilegál iha tasi Timor.
“Fudasaun Mahein nia rekomendasaun mak ne’e, husu para Governu haforsa relasaun bilaterál ho Indonézia no Austrália liuhosi kria mekanismu relasaun kordenada ho nasaun sira ne’e para ita bele halo vijilánsia hodi kontrola ita-nia peska ilegál sira ne’ebé mak tama iha ita-nia teritóriu tasi Timor nian”, Nelson Belo hateten ba jornalista TATOLI iha Sentru Chega, Balide kinta, ohin.
Tuir Nelson, kona-ba kestaun kontrolu tasi Timor, Governu Timor-Leste labele halo kontrolu ho di’ak tanba falta fasilidade.
“Peska ilegál iha tasi, ita seidauk bele halo kontrolu ho másimu tanba ita-nia tasi ne’e luan tebes tebes, agora problema ne’ebé ita-nia Estadu iha mak kapasidade kontrola ba tasi mós menus”, nia dehan.
Nia fundamenta katak durante ne’e iha Ró rua hosi komponente Navál, maibé labele hakur tasi mane.
“Tanba ne’e hosi aspeitu polítiku, ita iha ona Autoridade Nasionál Marítima (ANM). Maibé iha implementasaun ita presiza iha ekipamentu, tanba ne’e husu atu Governu presiza investe iha ekipamentu, atu halo seguransa ba ita-nia rikusoin iha tasi”, nia adianta.
nia hateten, durante ne’e Fundasaun Mahein laiha dadus fixu kona-ba ikan hira mak lakon iha tasi laran.
“Maibé ami husu Governu tenke kria relasaun kordenada ida ho Indonézia tantu Austrália atu halo kontrolu ba atividade peska illegal”, nia dehan.
Diretór Fundasaun Mahein husu ba IX Governu Konstitusionál atu kria polítika seguransa nasionál atu bele gia hodi bele organiza di’ak liután institusaun seguranasa no defeza.
“Fundasaun Mahein nian rekomendasaun ida tán mak ne’e husu Governu atu kria polítika seguransa nasionál tanba bele gia ita bele organiza ita-ni institusaun defeza no seguransa atu apar saida mak sai risku ba ameasa ba ita-nia Estadu”, nia dehan.
“Se ida ne’e la iha kada Governu ida mai, hakarak halo rekrutamentu, halo reforma no reativa ba reformadu sira konforme nian hakarak, maibé kuandu iha ona polítika Seguransa Nasionál, Governu sé de’it mak mai, nia tenke apar ho polítika seguransa nasionál nian”, Belo hakotu.
Jornalista: Natalino Costa
Editór : Zezito Silva
