iklan

NASIONÁL, HEADLINE, POLÍTIKA

PM Xanana sei partisipa reuniaun nível a’as ASEAN iha Jakarta

PM Xanana sei partisipa reuniaun nível a’as ASEAN iha Jakarta

Primeiru-Ministru, Kay Rala Xanana Gusmão, dada-lia ho Embaixadór Repúblika Indonézia iha Timor-Leste, Okto Dorinus Manik, iha Palásiu Governu, kinta (24/08/2023). Imajen/Mídia GPM

DILI, 24 agostu 2023 (TATOLI)–Primeiru-Ministru (PM), Kay Rala Xanana Gusmão, konvoka enkontru ho Embaixadór Repúblika Indonézia  iha Timor-Leste, Okto Dorinus Manik, hodi atualiza reuniaun nível a’as ka Konferensi Tingkat Tinggi (KTT) Asosiasaun Nasaun Sudeste Aziátiku (ASEAN, sigla inglés), ne’ebé sei realiza durante loron-tolu, hahú loron 05 to’o 07 setembru tinan ne’e, iha Jakarta, Indonézia.

Embaixadór konsidera partisipasaun Xefe Governu importante tebes hodi hato’o Timor-Leste nia hanoin ba membru asosiasaun tomak.

“Ha’u mai atualiza partisipasaun Primeiru-Ministru, Kay Rala Xanana Gusmão iha Konferensi Tingkat Tinggi ASEAN iha Jakarta, ne’e importante tebes ba Timor-Leste,” Embaixadór hateten hafoin hasoru Xefe Ezekutivu iha Palásiu Governu, kinta ne’e.

Notísia relevante : Timor-Leste kontribui rihun $100 ba sekretaridu tékniku ASEAN iha Jakarta

Nia haktuir, Primeiru-Ministru agradese ho konvite ne’e no sei partisipa iha konferénsia ne’e hodi asiste mós serimónia hand over Prezidénsia ASEAN hosi atuál Prezidente Repúblika Indonézia, Joko Widodo entrega hikas baindeira ASEAN ba Prezidente Laos, Thongloun Sisoulith maka sei sai uma-na’in asosiasaun iha tinan ne’e.

ASEAN harii iha loron 08 agostu 1967 iha Bangkok, Tailándia, hosi nasaun fundadór lima hanesan Indonézia, Malázia Filipina, Singapura no Tailándia, liuhosi deklarasaun Bangkok.

Nasaun tama ASEAN tuir loron Indonézia, Malázia, Singapura, Tailándia, Filipina (08 agostu 1967), Brunei Darussalam (08 janeiru 1984), Vietname (28 jullu 1995), Laos (23 jullu 1997), Myanmar (23 jullu 1997) no Kamboja (20 abríl 1999), enkuandu Timor-Leste foin hetan estatutu nu’udar observadór no sei sai membru plenu direitu iha tinan 2025.

Iha tinan 2003, asosiasaun lansa komunidade bazeia ba pilár tolu hanesan seguransa, ekonómika no sosiál kulturál.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!