2018-2021-TL lakon ikan maizmenus 388.1720 tonelada
DILI, 25 agostu 2023 (TATOLI) – Ministériu Agrikultura Peska, Pekuaria no Floresta liuhosi Diresaun Jerál Peska rejista iha 2o18 to’o mai 2021 Timor-Leste lakon riku-soin iha tasi liuliu ikan maismenus hamutuk 388.1720 tonelada.
“Bazea ba dadus ne’ebé Diresaun Jerál Peska kolleita hosi satellite katak ita deteta, hahú hosi 2018 to’o 2021, totál ró ne’ebé mak halo atividade peska ilegál iha tasi Timor ne’e hamutuk 266 unidade. Loron ida iha ró 40 to’o 50 mak tama mai tasi Timor hodi halo peska. Ita-nia ikan ne’ebé lakon ita halo kalkulasaun hahú hosi 2018-2021 hamutuk 388.1720 toneladas no ita kuandu ekivale ba osan hamutuk milllaun 300-resin”, Diretór Jerál Pekas Acacio Guterres ba jornalista TATOLI iha MAP Comoro, sesta ne’e.
Nia dehan, ró sira ne’ebé tama mai tasi Timor hodi halo atividade peska ilegál ne’e sira mai ho ekipamentu modernu ne’ebé dala ruma halo estragu ba embienta tasi nian.
“Durante ne’e ita la iha ekipamentu atu halo prevensaun ba peska illegál, maibé ita só deteta satellite, tanba kuandu ró peska ilegál tama mai tasi Timor, satellite deteta ona. Nune’e mós uluk ami halo monitoriza liuhosi webside ida naran global Fishing world ne’ebé ke ita uza para deteta ró ilegál sira, maibé webside ne’e Indonézia nian entaun sira taka ona ita labele asesu”, nia adianta.
Acacio hateten, kombate peska illegál sai hanesan preokupasaun Timor-Leste, tanba Timor-Leste seidauk iha meius apropriadu atu uza hodi kombate ba peska illegál iha tasi.
Maske nune’e, DJ peska ne’e hateten, Governu estabelese ona Autoridade Nasionál Marítima (ANM) ba oin sei haforsa autoridade ida ne’e liuliu Ministériu relevante sira ne’ebé mak hola parte iha autoridade ne’e bele halo servisu iha tasi hodi halo prevensaun peska ilegál iha tasi-timór.
“Ita to’o agora seidauk iha meius atu kontrola iha ita-nia tasi mane hodi halo kotrolu kle’an liubá tasi laran, maibé ita estabelese ona Autoridade Nasionál Marítima”, nia informa.
“Ita servisu hamutuk ho seguransa no Defeza, ita buka dalan nafatin ho nasaun sira seluk oinsa mak bele apoiu kombate peska illegál”, nia afirma.
Acacio fudamenta, Governu atuál haforsa kooperasaun iha nivél rejionál ne’ebé hanaran Arafura Timor Sea no nasaun hanesan Indonézia, Timor-Leste, Papua Nova Guine no Austrália atu ba oin bele kontrola peska illegál sira.
“Ida ne’e mak esforsu sira ne’ebé ita halo no parte seluk ita iha kooperasaun ho Indonézia ne’ebé hanaran Indonézian Sean, Agua Martima ecosystem no koopersaun ida ne’e Indonézia mak lidera no koperasaun ne’e atu halo kontrolu iha fronteira tasi-timór hodi asegura peska ilegál iha fronteira marítima nasaun rua”, nia informa
“Kooperasaun ida ami halo ona, reuniuan ho parte Indonézia loron rua liubá hodi koalia kona-ba asuntu ne’e, ita espera katak ho enkontru sira ne’e nasaun sira bele ajuda malu prevene peska illegal”, nia konklui.
Jornalista: Natalino Costa
Editór : Zezito Silva
