DILI, 25 agostu 2023 (TATOLI) – Ministériu Agrikultura Peskas Pekuaria no Floresta (MAPPF) liuhosi Diresaun Jerál Peska planeia atu prevé fila fali osan millaun $5 hodi kontrui ró peska rua atu bele kontrolu peska ilegál iha tasi-timór.
“Ami enkontru ona ho Ministru Agrikultura Peskas Pekuaria no Floresta, ko’alia mós asuntu oinsá iha tinan oin ita prevé fila fali orsamentu milliaun $5 iha Orsamentu Jerál Estadu (OJE) 2024 hodi kontrui ró peska rua, hodi hasae produtividade kontrolu atividade peska ilegál iha ita nia-tasi”, Diretór Jerál Pekas Acacio Guterres ba jornalista TATOLI iha MAP Comoro, sesta ne’e.
Nia rekorda, iha VIII Governu Konstitusionál, Ministeriu Agrikultura Peska (MAP) prevé orsamentu milliaun $3 hodi kontrui ró peska rua ho objetivu atu halo kontrolu movimentu peska ilegál.
Nune’e, prosesu ba konstrusaun ne’e rasik momentu ne’ebá, VIII Governu aprova ona iha nivél Konsellu Ministru no loke ona konkursu iha Komisaun Nasionál Aprovizionamentu (CNA, sigla portugés).
Nia esplika, iha empreza hosi Indonézia ho naran Dok hosi Blitung Indonézia mak sai manán nain ba konkursu ne’e no empreza refere lori ekipa tékniku hosi Ministériu Agrikultura momentu ne’e ba haree fatin no diskusaun kle’an molok kostrui ró rua ne’e, bainhira ekipa sira fila, kompaña ne’e lori dokumentu ida hodi husu tán osan adisionál milliaun $2-resin ba kustu konstrusaun ró peska rua ne’e.
Tanba ne’e, Governu kansela tiha prosesu konstrusaun ba ró peska rua ne’e tanba kustu ne’ebé kompañia aprezenta la hanesan ho plafon orsamentu ne’ebé Governu prevé ba konstrusaun ró rua ne’e.
“Ró rua ne’e ita halo ona prosesu konkursu iha CNA, depois ita nian tékniku sira ba haree kompañia manán nain nian fatin atu hahú halo kontrusaun ba ró ne’e, maibé to’o tiha iha ne’ebá kuandu ita nian tékniku fila fali mai, kompañia ne’e husu tán fali orsamentu adisionál ne’ebé ke mais milliaun $2 tán”, Acacio relembra.
“Entaun ida ne’e mak ita deside di’ak liu ita kansela prosesu konstrusaun ba ró peska rua ne’e tanba la hán malu ho ita nian plafón orsamentu, tanba antes ne’e ekipa tékniku sira halo diskusaun ho kompañia manán nain aseita ona ho orsamentu ne’ebé Governu prevé ona, la koalia kona-ba kustu maibé ikus nia husu tán osan adisionál, tanba ita deside di’ak liu kansela”, nia dehan.
Tuir Acacio, Prmeiru Ministru Xanana Gusmão orienta planu konstrusaun ba ró peska ne’e kontinua, maibé tau iha OJE 2024 nian, tanba tinan ne’e labele, la loke konkursu ba konstrusaun ró peska.
“Kombate peska ilegál ida ne’e la’os responsavél ministériu agrikultura nian de’it maibé ida ne’e dala ruma asosiadu ministériu relevante ne’ebé ita presiza servisu integradu ho ministériu sira seluk para kombate peska illegál”, nia afirma.
Jornalista: Natalino Costa
Editór : Zezito Silva
