DILI, 25 agostu 2023 (TATOLI)—Prezidente Konsellu Kombatente Libertasaun Nasionál (CCLN, sigla portuges), Vida de Jesus “Riak Leman”, hateten veteran ne’ebé mak falsifika dokumentu hodi hetan pensaun hosi Estadu ne’e sai obstákulu boot ba CCLN hodi aselera verifikasaun dadus veteran rejistadu 2009.
Notísia Relevante: MAKLN buka tuir nafatin veteranu falsu no hapara pensaun
“Verifikasaun dadus veteranu ne’e sai obstákulu boot ida ba ami konsellu, tanba defisil atu aselera. Tanba obstákulu ne’e mak prejudika no ita labele aselera tanba ita presiza buka hatene informasaun sira hosi nia sasin,” Riak Leman hateten ba Agência Tatoli, iha nia kna’ar fatin Arte Moris, Comoro, sesta ne’e.
Tanba ne’e, nia husu ba veteranu sira atu hato’o buat ne’e loloos no momoos ba ekipa ka konsellu vefrifikasaun sira, nune’e bele finaliza lalais verifikasaun hodi bele taka sai ninia validasaun.
“Kona-ba veteranu ne’ebé falsifika dadus hodi hetan pensaun ne’e, ami Konsellu Kombatente la halimar. Partisipa funu ne’e, partisipa duni la’ós mai bosok no aat liután falsifika dadus ne’e la di’ak. Ida-ne’e ba Konsellu Kombatente hanesan obstákulu boot ida, maibé atu dehan de’it katak membru sira-ne’ebé eleitu iha kongresu ne’e responsabiliza sira uluk organiza no mobiliza funu ita-nia populasaun. Ne’ebé, ami hatene di’ak-liu no koñese malu hela. Tanba, ha’u mós hola parte no responsabiliza iha rejiaun III mai to’o Dili. Ida-ne’e ha’u-nia kontrola, tanba ne’e ema mai atu bosok ha’u ne’e susar uitoan tanba hatene ema sé mak envolve halo funu no lae,” nia dehan.
Notísia Relevante: Konsellu Veteranu husu veteranu sira labele falsifika dokumentu
Ministru Asuntu Kombatente Libertasun Nasionál (MAKLN), Gil da Costa Monteiro “Oan Soru”, hateten iha mandatu tinan lima ne’e MAKLM hamutuk nia Sekretária Estadu Asuntu Kombatente Libertasaun Nasionál (SEAKLN) hodi buka no tuir veteranu halo falsifikasaun dadus hodi entrega ba Ministériu Públiku (MP) no prosesa tuir regra ne’ebé iha.
“Ami buka veteranu falsifika dokumentu ne’e hanesan buka laho hafuhu busa. Ami la’o hela, ami hetan ona balun, ami hapara dadauk ona osan. Hanesan uluk, ha’u sei sekretáriu estadu, ha’u ko’alia kona-ba ida-ne’e barak loos hodi hapara lubuk ida ona maibé ha’u ho ha’u-nia sekretária Estadu nafatin buka tuir. No hosi VIII Governu mai to’o ohin loron ema ne’ebé simu osan ne’e liu ona ema 500-resin,” Oan Soru dehan.
Hosi ema 500-resin ne’e balun ba ona Ministériu Públiku (MP), tanba MAKLN mós iha gabinete auditoria ne’ebé halo servisu hodi identifka ema-ne’ebé mak falsifika no husu sasin tenke iha evidénsia ba nia partisipasaun funu iha ai-laran.
“Maibé mak iha ne’ebá atu loke prosesu investigasaun ne’e sira-nia kompeténia ona, la’ós ami-nia problema ona. Ami-nia mak hatama ba sira de’it, nune’e ami buka nafatin veteran sira falsifika dokumentu,” nia hateten.
Notísia Relevante: MP halo hela investigasaun ba dokumentu veteranu “falsu” 500-resin
Jornalista : Osória Marques
Editór : Cancio Ximenes
