iklan

DESPORTU, MUNISÍPIU, VIQUEQUE

Autoridade Viqueque husu GAM kria unidade no pás

Autoridade Viqueque husu GAM kria unidade no pás

Konferénsia dahuluk Federasaun Silat Timor Leste (FESTIL) iha Viqueque hodi hili estrutura munjsipál. Imajen Tatoli/Vitorino Lopes da Costa.

VIQUEQUE, 26 agostu 2023 (TATOLI)—Sekretáriu Adiministradór Viqueque, Teotonio Sarmento da Silva, husu grupu arte marsiál (GAM) ne’ebé hamahon aan iha Federasaun Silat Timor Leste (FESTIL) kolobora hamutuk ho autoridade hodi kria unidade, estabilidade no pás iha Viqueque.

“Iha konferensia FESTIL ne’ebé ohin atu hili estrutura iha munisípiu Viqueque, ha’u husu imi hotu atu kria unidade, karik mosu buat ruma imi halai hamutuk hodi konsulta malu, hodi ita-nia munisípiu Viqueque nafatin iha pás labele sai hanesan problema sira iha Dili,” Teotonio Sarmento da Silva hateten iha konferénsia FESTIL dahuluk iha munisipiu Viqueque, iha salaun Viqueque, sábadu ne’e.

Autoridade agradese tanba agora FESTIL estabelese tan estrutura iha Viqueque hodi bele kontrola membru sira-ne’ebé signifika seguransa metin, tan ne’e husu ba kongresista sira hili malu tuir konsensu hodi sai di’ak ba munisipiu ida-ne’e hamutuk hodi sai unidu, tanba imi mak sei reprezenta munisípiu ba rejionál, nasionál no internasionál.

Nia dehan, daudaun ne’e GAM sira iha Viqueque sei unidade nune’e ba oin nafatin kria unidade, pás no establidade no iha buat ruma mosu hamutuk hodi hadi’a, nune’e bele hatudu ba munisípiu seluk katak Viqueque-oan unidu.

Prezidenti FESTIL, Hermeengildo Costodio da Silva, hateten bazeia ba estatutu FESTIL númeru 9/3 fó dalan atu estabelese estrutura iha nivel munisípiu hodi fó mahon ba FESTIL iha munisípiu Viqueque.

“Objetivu hosi konferensia ida-ne’e hodi lori ukun FESTIL nasionál mai Viqueque. Bainhira estabelese ona estrutura iha munisípiu, iha nasionál la presiza mai munisípiu. Ami iha nasionál simu relatóriu de’it. Estrutura FESTIL iha munisípiu mak sai jestór ba organizasaun ne’ebé hamahon iha federasaun ida-ne’e,” nia dehan.

Daudaun ne’e, FESTIL estabelese ona iha munisípiu hitu inklui munisípiu Viqueque no tinan oin sei ba estabelese iha munisípiu seluk.

Konferénsia FESTIL dahuluk iha munisípiu Viqueque ne’e, kongresista hamutuk na’in-51 ne’ebé mai hosi organisaun IKS, PSHT, KORK, PADJARAN no PERISAI DIRI ne’ebé esziste iha munisípiu Viqueque hodi hili estrutura FESTIL.

Grupu arte marsiál ne’ebé hamahon aan iha FESTIL ne’e kompostu hosi IKS, PSHT, Perisai Diri, KORK, PADSAJARAN no Seruling Dewata ne’ebé mak iha federasaun nian okos.

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!