Responsável kaixa Zebra Leão Uaioli entrega dokumentu rezisténsia ba AMRT
BAUCAU, 26 agostu 2023 (TATOLI)—Responsável kaixa klandistina Zebra Leão hosi suku Uaioli, postu admistrativu Venilale, munisípiu Baucau, entrega dokumentu rezisténsia hosi KOmandante Em Xefe FALINTIL, Kay Rala Xanana Gusmão, ba Arkivu Muzeu Rezisténsia Timorense (AMRT).
Diretór Ezekutivu AMRT, Hamar Antóninho Baptista Alves, hateten lutadór sira atu fiar ba AMRT tanba harii hosi Estadu Timor-Leste hodi asegura no salva dokumentu luta iha teritóriu nasionál sai nu’udar istória luta ba ukun rasik aan.
“Aktu ne’ebé irmaun Uaiquia halo, ita hotu sai testamuña, responsavél ba vida nasaun no propiu nian hodi asegura dokumentu ida-ne’e too ohin loron,” Diretór Ezekutivu AMRT ne’e hateten iha Uaioli, sábadu ne’e.
Dokumentu ne’ebé rekolla iha kaixa Zebra Leão, suku Uaioli sei prezerva iha Dili ne’ebé futuru sei asesu hosi públiku no estudante liuhosi portál inklui haree dereta iha sede nasionál AMRT Dili.
Hamar Alves husu atu veteranu hotu ne’ebé sei asegura dokumentu hanesan imajen, guia da marsa no korespondénsia iha fatin ruma, presiza halo kontaktu ho AMRT atu rekolla inklui entervista hodi asegura iha muzeu tanba iha posibilidade estragu bainhira la kuidadu ho di’ak.
Sekretáriu Estadu Asuntu Kombatente Libertasaun Nasionál, César dos Santos da Silva, hateten loron ohin signifikadu tebes tanba fatin rezisténsia sai abrigu subteranu ba komandante em xefe Falintil, Kay Rala Xanana Gusmão, ne’ebé establese bazeia ba orientasaun komandu hodi asegura dokumentu luta iha tinan-1983.
“Irmão Uaiquia hatene ariska vida entre mate mo moris maibe tau aan iha risku ho espíritu aas liuliu responsabilidade hodi asegura dokumentu luta ho konfidensiálidade,” César da Silva hateten.
Governante ne’e konsidera, situsaun ohin sai sasin ba irmaun Uaiquia ho nia grupu ne’ebé nakonu ho espíritu responsabilidade hakarak entrega dokumentu luta ba instituisaun kompotente nu’udar sinál sentidu Estadu nakonu ho antuziazmu.
Kaixa Zebra Leão hahú estabelese bainhira Uaiquia hamutuk ho lutadór Venilale-oan tun iha vila hafoin no halo kontaktu ho Komandante Rosito Da Silva (josi Ossú) hodi prepara kondisaun atu halo ligasaun entre vila ho ai-laran nune’e kaixa refere establese iha loron-25 fulan-maiu tinan-1980.
Responsável kaixa Zebra Leão, Marcal da Silva ‘Uaiquia’, nu’udar eis asistensia politiku rejiaun II, argumenta dokumentu sira refere nia kuidadu durante tinan-40 resin nune’e ohin deside entrega ba AMRT tanba konsidera inportante ba jerasaun kontinuadór sira iha futuru.
“Ha’u fo lia-menon ba AMRT kuidadu didi’ak atu husik hela ba ita-nia jerasaun foun sira iha futuru,” Uaiquia hateten.
Dokumentu refere entrega hosi responsavél kaixa Zebra (zona libre) Leão, sub-kaixa Hali Lulik, sub-kaixa Isin Moris, sub-kaixa Moris Susar, sub-kaixa Oan Ki’ak, sub-kaixa Leque Osso, sub-kaixa Frente Makmur, sub-kaixa Uaidau Kiak, sub-kaixa Kuluhun Dili, sub-kaixa Rai-Hun no kaixa Nautetu.
Dokumentu Rezisténsia ne’ebé entrega uza hosi komamdante em xefe Falintil Xanana Gusmão, sub-xefi Komandante David Alex Daitula inklui segundu Komandante brigada vermella Ologario Asswa’in kompostu hosi mapa operasaun, guia de marsa, korespondénsi hamutuk 311 ho objetivu rua hanesan binuklu no aparellu komunikasaun (Raido HT).
Jornalista : Natalino Belo
Editór : Cancio Ximenes
