SEFOPE hahú identifika fatin ba sentru formasaun dalen Inglés-Korea iha Viqueque
VIQUEQUE, 26 agostu 2023 (TATOLI)—Ekipa Sekretária Estadu Formasaun no Profisionál Empregu (SEFOPE), sábadu ne’e, hahú halo indentifikasaun ba fatin formasaun dalen Inglés no Korea hodi fasilita joven sira Viqueque.
Sekretáriu Estadu Formasaun no Profisionál Empregu (SEFOPE), Tuir SEFOPE, Rogério de Araújo Mendonça, hateten ekipa mai vizita munisípiu Viqueque hodi identifika fatin atu loke sentru formasaun ba lingua nian nune’e joven sira bele partisipa la lika ba tan nasionál maka tuir formasaun.
“Ohin, ami mai Viqueque atu koordena hamutuk ho autoridade Viqueque no dirasaun SEFOPE hodi halo identifikasaun fatin ba sentru formasaun lingua nian iha Viqueque, atu ita-nia joven sira lalika halai ba Dili mak tuir kursu. Iha munisípiu, joven sira bele hetan tanba agora daudaun Austrália no Korea presiza ita-nia traballadór barak, ida-ne’e ita prepara ita-nia traballadór hodi ba serbisu iha rai-li’ur.” Governante ne’e hateten ba jornalista sira iha Viqueque, sesta ne’e.
Governante ne’e hatutan, loke sentru formasaun lian nian, SEFOPE agora daudaun tau ona ba planu hodi loke sentru formasaun ba munisípiu sira hodi fasilita joven sira apreende lian iha munisípiu, depois atu teste mak ekipa nasionál tun hodi fó teste.
Tuir planu, loke sentru formasaun sei loke iha 2024 liuliu ba sebtru formasaun ba lian inglés no Korea uluk mak hafoin sei loke tán lian Japaun, atu nune’e joven sira bele aproveita kursu ho di’ak.
“Tanba kursu lian iha nasionál ita-nia joven sira sei gasta osan, aluga uma, distánsia dook. Tan ne’e mak ami hanoin, di’ak-liu loke iha munisípiu atu joven sira lalika halai ba dook mak tuir formasaun. Bainhira fatin ne’ebé ami identifika iha hotu ona, iha 2024 hahú fó formasaun no ami sei kontrata formadór lian ingles ema na’in-neen,” nia dehan.
Fatin sentru formasaun provizoriu hahú identifika iha Eskola Sekundária 04 Setembru Viqueque sala haat ne’ebé sei uza iha lorokraik, tanba iha dadeersa ne’e estudante sira uza hodi halo prosesu aprendizajen.
Aleinde loke sentru formasaun, nia dehan, SEFOPE mós identifika rai ba edifísiu SEFOPE Viqueque ba fintura konstrusaun ne’ebé kompleta ho fatin formasaun iha munisípiu Viqueque ihaárea Beloi.
“Ami mós identifika rai ba edifisiu SEFOPE Viqueque tanba agora sira okupa de’it sala munisípiu Viqueque ne’ebé kloot hodi difikulta ba ita-nia funsionariu sira hala’o serbisu. Nune’e agora ami identifika hotu sei tau hotu ba planu 2024 nian,” nia hateten.
sekretáriu Adiministradór Viqueque, Teotonio Sarmento da Silva, hato’o agredesimentu ba SEFOPE ne’ebé hanoin atu loke tán sentru formasaun lian ba joven sira iha Viqueque, no ida-ne’e sai oportunodade di’ak ba Viqueque-oan sira la hakat dook mak tuir formasaun.
“Ha’u hanoin planu SEFOPE nian ida-ne’e di’ak tebes, tanba ajuda joven sira-ne’ebé iha interrese hakarak ba rai-li’ur, la presiza atu tuir kursu iha Dili, maibé apreende iha munisípiu de’it,” nia dehan.
Jornalista : Vitorino Lopes da Costa
Editór : Cancio Ximenes
