iklan

ERMERA, HEADLINE, MUNISÍPIU, POLÍTIKA

Oan Soru husu veteranu atu hahú hakerek istória

Oan Soru husu veteranu atu hahú hakerek istória

DILI, 27 agostu 2023 (TATOLI)– Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” husu ba veteranu sira iha territóriu nasionál atu hahú hakerek istória luta independénsia hodi sai memória ida ba jerasaun foun sira iha futuru.

“Husu ba veteranu hotu-hotu, hahú agora hakerek ona imi-nia istória. Istória badak ka naruk ne’e kestaun seluk maibé tenke hakerek hodi nune’e memória sira-ne’e labele lakon de’it husi jerasaun foinsa’e sira hodi nune’e ema se valoriza istória hirak-ne’e, bainhira la hakerek mak istória ne’e sei inventa de’it,” nia haktuir liuhosi nota imprensa ida bainhira inaugura monumentu saudozu Gabriel Ximenes “Fitun” hosi família uma lisan Maijor-Maulei, ne’ebé Tatoli asesu, domingu ne’e.

Oan Soru hatutan, família hotu-hotu espesialmente ba lisan hotu hotu iha Aitura, no hanesan ministru ne’ebé mak toma konta ba asuntu kombatente libertasaun nasionál , husik hela lia menon ba oan, bei-oan no família sira, liuliu ba jerasaun veteranu sira, atu konta istória ba oan sira no hakerek veteranu sira-nia istória iha surat tahan ida, hanesan evidénsia ne’ebé forte hodi prezerva.

“Tanba bainhira istória sira-ne’e mak la hakerek iha surat tahan ka livru ida mak luta veteranu sira-nia saugate de’it, tanba sofrementu barak, terus ne’ebé mak veteranu sira sente ema sei sura de’it ho liman fuan, konta de’it no sei lakon,” Oan Soru dehan.

Oan mane husi saudozu Gabriel Ximenes ” Fitun ” hatete, nia aman nia luta sura labele no sai hanesan istória ida ba família no nasaun ida-ne’e.

“Tanba ho nia dedikasaun luta ba ukun rasik-an sai hanesan istória ida, ba sira hodi konta no monumentu ne’e sai hanesan símbolu unidade entre família sira,” nia hateten

Prezidente Autoridade Munísipiu Ermera, Eusébio Salsinha, rekoñese saudozu “Fitun” hanesan inisiadór istória luta ba independénsia Timor nian.

“Nune’e husu ba oan no família sira atu kontinua prezerva memória no istória ne’ebé saudozu rai hela, saudozu hanesan veteranu ida-ne’ebé nia luta sura labele,” nia hateten.

Eis Komandante Rejiaun IV, Ernesto “Dudu” hatete, sakrifísiu ne’ebé família sira halo hodi harii monumentu iha Aitura hanesan sinál domin hosi oan no bei-oan sira hatudu ba saudozu nu’udar aman, tiu no avó.

Jornalista: Osória Marques

Editór: Evaristo Soares Martins

iklan
iklan

Leave a Reply

iklan
error: Content is protected !!