Autoridade Covalima fó hanoin ba joven sira kria pás-estabilidade
COVALIMA, 28 agostu 2023 (TATOLI)–Reprezentante, Administradór, Munisípiu Covalima, Afonso Nugueira Nahak, fó hanoin ba joven-sira-ne’ebé envolve iha Grupu Arte Marsiál no Grupu Arte Rituál atu kria pás no estabilidade.
“Agora daudaun buat ne’ebé sai ameasa boot ba ita-nia nasaun Timor-Leste, espesiál munisípiu Covalima mak Grupu Arte Marsiál (GAM) no Arte rituál (AR) hanesan aman, tiun no avó, ha’u fó hanoin ba ita-boot sira-ne’ebé envolve iha GAM no Grupu Arte Rituál (GAR) tenke dixiplina atu labele hasoru malu tenke kria pás no estabilidade,” Afonso Nugueira Nahak hateten liuhosi nia diskursu, iha salaun Eskola Sekundáriu Jerál Públiku Suai, segunda ne’e.
Autoridade Covalima ne’e fó hanoin ba joven sira-ne’ebé envolve iha grupu Arte Marsiál no Arte Rituál atu labele hasoru malu ho konfrontu maibé tenke kria pás no estabilidade, iha nasaun Timor-Leste, tanba iha tempu okupasaun Indonezia mós joven sira tuir Grupu Arte Marsiál.
Tanba, nia dehan, hanesan joven sira tenke hanoin didi’ak maske tuir organizasaun arte marsiál no arte rituál sai hanesan seni bela diri, la’ós atu konfrontu hasoru malu maibé keta haluha matenek vale liu forsa hotu-hotu.
Daudaun ne’e, fatór tolu sai ameasa Timor-Leste espesiál ba Covalima mak hanesan Grupu Arte Marsiál, Arte Rituál no importasaun ai-han hosi nasaun li’ur hanesan Ayam Potong no seluk tan nune’e labele konsumu beibeik naan ayam potong demais.
“Ha’u husu joven agora daudaun Moras HIV/SIDA, importasaun aihan atu labele konsumu beibeik ayam potong no arte marsiál no arte rituál,” nia dehan.
Tuir dadus, Sub KRAM Munisípu Covalima Rejista Grupu Arte Marsiál no Arte Rituál sira hanesan Persaudaraan Setia Hati Terate (PSHT), Ikatan Kera Sakti (IKS), Kmanek Oan Raiklaran (KORK) no arte rituál sira hanesan Konfu Master, Colimau 200, Silat Nasionál Padjaran, Kempo, Karate no seluk tan.
Jornalista : Celestina Teles
Editór : Cancio Ximenes
