COVALIMA, 28 agostu 2023 (TATOLI)–Diretór Servisu Edukasaun Munisípiu Covalima, Francelino Freitas Carvalho hateten, Servisu Edukasaun Covalima identifika ona kondisaun eskola 21 ne’ebé aat atu konsttrui no reabilta iha tinan 2024.
”Bazeia ba planu Servisu Edukasaun Covalima atu konstrui no reabilita eskola iha tinan 2024 mak hanesan Eskola Bázika Cetrál Bulu, Gala, Fatululik, Eskola Bázika Filiál Halik, Has Ain, Fatuleto, Fatuloro, Makous, Lokeu, Aidawan Tuik, Dato-moris, Koitau inklu eskola sekundáriu klase paralela Sanfuk, Salele no seluk tan,” Francelino Freitas Carvalho hateten ba Agência Tatoli iha nia ka’ar fatin, Santa Rosa, segunda ne’e.
Eskola hirak ne’e presiza halo konstrusaun no reabilitasaun, tanba haree ba kondisaun eskola ladún faboravél ba estudante sira atu tuir prosesu aprendizajen loro-loron nian.
Edukasaun Covalima tau planu ba tinan 2024 atu reabilita eskola 21 maibé iha tinan 2023 Governu liuhosi Ministériu Edukasaun Juventu no Desportu (MEJD) daudaun ne’esei konstrui no reabilita eskola sia (9) liuhosi projetu komunitária.
“Atu reabilita no konstrui eskola ba tinan 2023 ita nia grupu sira asina ona kontratu hein orsamentu, nune’e sira bele hahú konstrui no reabilita eskola sia (9) iha munisípiu Covalima,” nia hateten.
Tuir dadus hosi Servisu Edukasaun Covalima liu-liu Projetu Konstrusaun no Reabilitasaun Infraestrutura Edukativa (PKRIE) tinan 2023 hamutuk eskola sia (9) mak hanesan Eskola Bázika Filiál Tobur, Eskola Bázika Fohobua, EBF 1,2 Tilomar, Eskola Pre-eskolár Belulik Kraik, Eskola Pre-eskolár (EPE) Sai Loro, EPE Ogues, EPE Talioan, EPE Audian no EBF Zulo 1.2 Zulo Taz.
Jornalista : Celestina Teles
Editór : Cancio Ximenes
