DILI, 28 agostu 2023 (TATOLI) – Enkaregadu Negósiu Estadu Unidus Amerika (EUA) iha Timor-Leste Marc Weinstock, dehan EUA kompromete mantein apoia Timor-Leste hodi dezenvolve komponente aére Timor-Leste.
“Estadu Unidus Amerika, kompromete atu dezenvolve Komponente Aéro Timor-Leste, liuliu Komponente Aero iha Baucau no ami sei planu hodi kontinua konstrui fatin rai aviaun nian iha Baucau inklui ami mós sei kapasita formasaun lian ingles ba forsa komponente aero Timor-Leste nian”, Marc Weinstock iha nia intervensaun iha ámbitu abertura Ezersísiu Harii Hamutuk tinan ne’e iha Unidade Apoia Servisu (UAS) Metinaro, Segunda ne’e.
Enkaregadu Negósiu EUA ne’e hateten, Estadus Unidus komprometidu kontinua apoia militár Timor-Leste.
“Estadu Unidus Amerika komprometidu, hodi ajuda Timor-Leste hodi harii Timor-Leste ninian kapasidade Militár hodi asegura ninian fronteira sira”, nia adianta.
Marc Weinstock fundamenta katak foin lalais ne’e EUA apoia ona aviaun patrollamentu ida ho tipu CESSNA 206, PA-002 ne’ebé monta kedan ho fasilidade intelijénsia no vijilánsia nian oinsá F-FDTL uza hodi halo kontrollu no vijilánsia iha área Aero Timor-Leste nian.
Nune’e mós, tempu badak liuhosi kooperasaun ne’ebé mak iha, Austrália mós apoia Ró patrollu Gordian, nune’e, liuhosi kooperasaun sira ne’e sei estabelese padraun multilaterál seguransa marítima iha Timor-Leste.
“Estadus Unidus Amerika sei kontinua dezenvolve oportunidade ho ita bo’ot sira no hametin ita- nia parseria hodi asegura futuru ida ne’ebé nabilan liu”, diplomata ne’e haktuir.
“Ho ezersísiu ida ne’e, simboliza kresimentu iha ita-nian esforsu multilaterál no hametin ita-nian kooperasaun no parseria ho parte hotu ne’ebé marka presenza iha iha ne’e”, nia adianta.
Diplomata EUA ne’e hateten, maske foin semana rua hela iha Díli, maibé nia sente kontente halo kna’ar iha Díli.
“Hau foin mak to’o iha ne’e halo semana rua, maibé ha’u bele haree katak posibilidade hirak ne’ebé iha, sei laiha rohan, karik ita iha kultura no identidade la hanesan, maibé ita kompartilla valór ne’ebé hanesan, ita valoriza demókrasia, soberania no orden interanasionál bazea ba regra”, Marc Weinstock hakotu.
Iha fatin hanesan, Kapitão Mar e Gerra, João Silva, hateten Estadus Unidus Amerika apoiu ona aviaun CESSNA no hahú harii komponente Aero.
Jornalista: Natalino Costa
Editór : Zezito Silva
