Falur enkorja sidadaun hotu tenke hametin espiritu 30 agostu 1999
DILI, 28 agostu 2023 (TATOLI) – Xefe Estadu Maiór Forsa Armada Timor-Leste, Tenente Jenerál, Domingos Raul ‘Falur Rate Laek, husu ba sidadaun hotu atu hametin valór no espiritu 30 agostu 1999.
Tuir nia, loron ida ne’e nudar loron importante tanba hakerek iha istória ba auto determinasaun Timor-Leste nian futuru.
“30 agostu ne’e loron ida ne’ebe ke libertasaun, povu tomak deside nian objetivu supremu ne’ebé uluk ita-nia avo sira, beiala sira ne’ebé funu ba sira-nia identidade kulturál, identidade ekonómiku, identidade polítiku no ikus, ita atinje ba ukun aan”, nia hateten ba jornalista sira iha Unidade Apoia Servisu (UAS) Metinaro, Segunda ne’e.
Falur hateten, atu hetan ukun aan la fasil, hahú hosi gerra fria ne’ebé desde beiala sira halo to’o mai funu remota hodi afirma luta ba libertasaun nasionál nian liuhosi sensbilizasaun opiniaun públika internasionál.
“Opiniaun públika ne’e mak fó presaun mak ita realiza vitória bo’ot ne’ebé mak ita alkansa mak ita hetan liberdade”, nia dehan.
Tanba ne’e, nia husu atu sidadaun hotu hodi hametin valór konsulta populár ne’ebé hala’o iha 30 agostu 1999 tanba loron ne’e nudar loron istóriku no iha signifikadu tebes.
“Husu ema labele trai ida ne’e, ema labele halo fo’er ida ne’e, ema labele hamis ida ne’e, ema tenke hametin”, Falur enkorja.
Iha biban ne’e, Falur kontinua husu ba inan aman sira atu hanorin oan sira, tanba joven ohin loron kria problema iha fatin-fatin tanba menus edukasaun hosi família.
“Joven kria konflitu ne’e, ita-inan aman mak eduka la diak, aban bainrua, inan aman tenke hanoin didiak para tenke hanorin di’ak no neste kazu Governu prepara kondisaun saida de’it para envolve joven sira iha atividade desportu sira hanesan tebe bola, basket nune’e evita joven halo konflitu”, nia afirma.
Jornalista: Natalino Costa
Editór : Zezito Silva
