Falur: Ezersísiu Harii Hamutuk reforsa kooperasaun militár rejionál
DILI, 28 agostu 2023 (TATOLI) – Xefe Estadu Maiór Forsa Armada Timor-Leste, Tenente Jenerál Domingos Raul Falur Rate Laek, dehan Ezersísiu Harii hamutuk tinan ne’e ba dala-11 iha Timor-Leste nudar afirmasaun importante ida ba F-FDTL tanba atu reforsa kooperasaun iha nivél rejonál hodi hamutuk ho forsa sira hasoru defezfiu no ameasa ohin loron nian.
Ezersísiu Harii Hamutuk ne’e nudar kooperasaun militár ida ne’ebé Timor-Leste estabelese ho nasaun haat seluk ho objetivu atu hametin kooperasaun militár iha nivél rejionál no hasa’e kapasidade militár F-FDTL.
“F-FDTL hakarak servisu hamutuk ho nasaun hotuhotu iha rejiaun hodi hasoru dezafiu komun sira hodi mantein pás no prosperidade. Hamutuk, ita bele harii vizaun komún ida kona-ba interese seguransa nian”, Tenente Jenerál Domingos Raul Falur Rate Laek,” iha nia intervensaun iha ámbitu abertura Ezersísiu Harii Hamutuk ne’ebé halao iha Unidade Apoia Servisu (UAS) Metinaro, Segunda, ohin.
Ezersisu ida ne’e sei foku iha área Enginaria oinsá militár hosi nasaun lima ne’ebé hola parte iha ezersísiu ida ne’e fó ajuda umanitária komunitária sira hadia falidade komunidade ne’ebé inklui fasilidade militár.
Tuir nia, Ezersísiu Harii Hamutk nudar ezersísiu anuál militár hosi nasaun lima mak hola partilla ezesísiu ne’e Timor-Leste, Austrália, Nova-Zelándia, Japaun, Estadus Unidus Amerika ezersísiu harii harii hamutuk ne’e lideradu hosi Timor-Leste.
Falur subliña, Ezersísiu Harii Hamutuk iha tinan ne’e partisipa hosi militár hamutuk 215 no ezersísiu ne’e halo iha Timor-Leste durante fulan ida.
Nia apresia ho Ezersísiu Harii Hamtuk ida ne’e bele lori vantajen di’ak ba forsa armdas F-FDTL.
“Ha’u hanoin ita hotu bele apresia importánsia husi ezersísiu ne’e ho ninia signifikadu ba relasaun entre ita-nia nasaun, liuliu iha Forsa Armada”, nia dehan.
Xefe Estadu Forsa Amada Timor-Leste ne’e hateten, ezersísiu ida ne’e meius interkámbiu hodi hasa’e kompriensaun no hametin konfiansa.
“Ita-nia interkámbiu hatudu kompromisu atu aprende ba malu. Parseria ne’e sei di’ak liu bainhira ita konsidera ámbitu husi ezersísiu no atividade militár ne’ebé kombinadu. Esforsu hirak-ne’e halo ita hakbesik liután ba malu hodi hatan ba ita-nia nesesidade sira”, nia adianta.
“Ha’u hein katak oportunidade sira hanesan ne’e bele kontinua atu ita serbisu hamutuk hodi rezolve problema sira ne’ebé ita-nia nasaun ida-idak hasoru”, nia afirma.
Tenente Jenerál Falur hateten, ho erzersisiu Harii Hamutuk ne’e F-FDTL hakarak nakloke ba kooperasaun hotuhotu.
“Ha’u hakarak hateten katak hosi F-FDTL nakloke ba kooperasaun, serbisu hamutuk, dezenvolve hamutuk no lansa projetu inovadór sira ho rai belun hotuhotu”, nia dehan.
Nia husu ba militár sira ne’ebé maka partisipasa iha ezersísiu harii hamutuk ne’e atu serbisu makas, serbisu ho di’ak, forma ekipa atu sai ekipa ne’ebé forte.
“Ho esperansa katak partisipante sira iha ezersísiu ne’e hetan esperiénsia ne’ebe pozitivu, ho rezultadu ne’ebe ita hotu hakarak. Ha’u dezeja ba ita boot sira hotu ezersísiu ne’ebe seguru no susesu”, Falur hateten.
Nia kongratula ba militár hosi Austrália, Estadus Unidus Amerika, Nova Zelandia no Japaun, ba sira-nia kompromisu hodi fó oportunidade ba F-FDTL hodi kontinua hola parte iha kooperasaaun ezersísiu harii hamtuk.
Iha fatin hanesan Enkaregadu Negósiu Estadu Unidus Amerika Marc Weinstock, hateten Estadus Unidus Amerika kompromete atu mantein kooperasaun iha área Defeza no seguransa.
“Estadus Unidus Amerika komprometidu hodi ajuda Timor-Leste hodi harii Timor-Leste nia kapasidade militár hodi asegura ninian fronteira sira”, nia dehan.
Iha fatin hanesan, Embaixadora Austrália iha Timor-Leste, Caitlin Wilson no Austrália iha komprometidu atu kontinua hametin kooperasaun iha Timor-Leste liuhosi ezersísiu harii hamutuk inklui kontinua kapasita militár F-FDTL iha lingua ingles.
Nune’e mós, Embaixadór Japaun iha Timor-Leste Kimura Tetsuya, dehan Japaun ho Timor-Leste nudar belun di’ak tanba ne’e Japaun sei haforsa kooperasaun iha kuakler área.
Jornalista: Natalino Costa
Editór : Zezito Silva
