DILI, 28 agostu 2023 (TATOLI)–Komunidade Bekusi kompostu hosi Bekusi kraik, sentru no leten la asesu bee-moos ne’ebé distribui hosi Bee Timor-Leste, Empreza Públika (BTL, E.P) durante semana ida resin ona, ne’ebé situasaun ne’e obrigadu komunidade tenke sosa ka buka bee iha fatin seluk ba nesesidade loroloron.
Diretór Manutensaun no Operasaun BTL, E.P, Aleixo dos Santos, klarifika, la’ós parte empreza estatál mak lakohi loke bee ba komunidade, maibé problema ne’e tanba eletrisidade mate lakan hela de’it, tanba ne’e difikulta ba sistema ne’ebé iha ligasaun ho mákina bomba bee, iha tangki boot ne’ebé lokaliza iha Bekusi, suku Becora, postu administrativu Cristo Rei, munisípiu Dili.
“Atu hateten katak durante semana ida nia laran iha problema oitoan iha bomba, ne’e impaktu hosi eletrisidade ne’ebé ladún funsiona ho di’ak, ne’ebé ekipa halo ona identifikasaun, aban (tersa) sei hasai bomba ne’e no sei serbisu durante oras 24 atubele rezolve problema ne’e,” Diretor hateten iha ninia knaar fatin, Caicoli, segunda ne’e.
Notísia relevante : Governu tenke kontrola komunidade halo ligasaun ilegál ba bee-moos
Diretór ne’e dehan, iha loron sábadu no domingu ekipa ne’ebé responsável la tama, tanba ne’e ekipa la sufisiente hodi rezolve kedas no iha segunda ne’e mak ekipa sira hosi BTL, E.P no Eletricidade de Timor-Leste, Empreza Públika (EDTL, E.P) tun ba terrenu hodi rezolve.
“Ne’ebé tersa ne’e sira hasai bomba no haree hikas fallansu sira ne’e. Ha’u espera katak kuarta ka kinta distribuisaun bee ba komunidade bele la’o normál fali ona. Bainhira ahi mate lakan ona, signifika bomba ne’e mós mate, bainhira kondisaun ne’e kontinua bele fó impaktu ba sistema bomba,” nia tenik.
Biban ne’e Diretór klarifika, bomba di’ak maibé instalasaun eletrisidade nia parte ida mak ladi’ak, ne’ebé tenke hasai bomba hodi hadi’a no halo instalasaun foun ba fiu sira.
Tuir Jerente ne’e, perfurasaun bee uza jeradór maibé bomba uza enerjia eletrisidade. Bee ne’ebé BTL, E.P fura uza enerjia eletrisidade mak hasai no uza enerjia eletrisidade mak lori bee ne’e ba tanki rezervatóriu iha fatin sira ne’ebé a’as.
“Tanba ne’e husu ba populasaun labele fura fali iha transmisaun sira tanba kuaze iha sistema perfurasaun populasaun sira fura antes tama ba tanki rezervatóriu. Ida-ne’e problema boot, dalaruma ita kuandu fura ona automátikamente bomba ne’ebé dudu bee ne’e ho nia forsa tomak dalaruma ita fura ona automátikamente forsa menus,”nia salienta.
Bekusi iha perfurasaun tolu, ida lokaliza iha sede suku Bekusi sentru, ida iha Maufelu no seluk iha Merkadu Becora, maibé ida distribui ba iha komunidade ne’e utiliza perfurasaun hosi Maufelu, ne’e distribui hotu ba iha rezervatóriu ida iha Berbidu ho kuantidade metru kúbiku 800, bee tama iha rezervatóriu mak distribui ba komunidade.
Jornalista : Antónia Gusmão
Editora : Julia Chatarina
