Autór soe bebé iha rezidénsia PAM Baucau entrega aan ba PNTL
BAUCAU, 29 agostu 2023 (2023) – Autór soe bebé iha rezidénsia Prezidente Autoridade Munisipál Baucau entrega aan ona ba komandu Polísia Nasionál Timor-Leste (PNTL) munisípiu Baucau.
Segundu Komandante PNTL Munisípiu Baucau, Superintendente Asistente José Casemiro de Carvalho, esplika, suspeitu nu’udar inan ba bebé ho inisiál LT idade 21 hosi munisípiu Ainaro nu’udar asisténsia uma ba Prezidente Autoridade Munisipál Baucau.
“Suspeitu rekoñese hahalok liuhosi oan feto PAM nune’e informa ba Prezidente Autoridade hodi informa direita ba eskuadra PNTL Baucau vila,” nia katak.
Parte seguransa rezidénsia PAM Baucau deskonfia suspeitu tanba mosu sinál eletrisidade mate lakan iha kuartu nune’e direita halo asegura tanba evita mosu akontesimentu relasiona ho vida suspeitu nian.
Ohin dadeer oras 06:00 hafoin rona informasaun parte PNTL halo kedas investigasaun no asegura autór hodi hein prosesu hosi Ministériu Públiku.
Bebé sexu feto moris iha loron-kinta, 24 agostu no soe iha loron-sábadu, 26 agostus no haloot ona iha semitériu Kairala, Buibau iha loron-segunda, 27 agostu hafoin halao autópsia iha Ospitál Nasionál Guido Valadares (HNGV, sigla portugés), Dili.
Rezultadu hosi autopsia deteta kauza bebé hakotu iis tanba raan intupidu iha kabun rezulta bebé hakotu iis.
“Ita sei iha rezidénsia PAM Baucau hodi kontinua hetan informasaun liuhosi akompañamentu ba suspeitu hodi halo investigasaun,” Superintendente Asistente José Carvalho akresenta.
Suspeitu rasik halo knaar nu’udar asistensia uma foin fulan-lima, hahú abríl no deteta isin-rua antes halo serbisu iha rezidénsia PAM nune’e bainhira partu bebé tau iha saku hodi soe iha arreadór Rezidénsia PAM lokaliza iha aldeia Ro-ulo, Suku Bahú, Vila Antiga, Baucau.
Jornalista : Natalino Belo
Editór : Evaristo Soares Martins
