Banku Mundiál aprezenta relatóriu nutrisaun
𝐃ILI, 𝟐9 agostu 𝟐𝟎𝟐𝟑 (TATOLI) – Reprezentante Banku Mundiál iha Timor-Leste Bernard Harborne, aprezenta relatóriu kona-ba nutrisaun, edukuasaun no kampu servisu ba juventude sira, ba Vise-Primeiru Ministru, Ministru Koordenadór ba Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, iha Palásiu Govenu.
Relatóriu ne’e bele sai referénsia ba Vise-Primeiru Ministru, hodi apar progresu no atinjimentu ba asuntu sosiál no dezenvolvimentu rurál nian.
“Dadus anteriór ne’e, ita iha ne’e ki’ik tebes, maibé ho kondisaun agora, dadus konklui ho númeru ne’ebé boot tanba ne’e presiza fó atensaun másima”, Assanami dehan liu hosi komunikadu ne’ebé Agência TATOLI asesu, ohin.
Assanami hateten, má-nutirusaun no stunting akontese problema ne’ebé kontribui makas mós mak bee-moos, tanba ne’e antes ne’e Governu deve ona Asian Development Bank (ADB) no Millenium Challege Account (MCA) ne’ebé oferese orsamentu tokon $420, investe iha bee-moos, maibé seidauk to’o tanba sei konsentra liu iha área urbana, iha Dili, Manufahi, Lautem no Viqueque.
Atu hamenus númeru problema má-nutrisaun no raes badak, BTL, E.P rezolve Bee-moos, Edukasaun esforsu hadia Merenda Eskolár, hosi sosiál halo hela Bolsa da mãe no Ministériu Saúde (MS) hala’o hela kampaña namanas oinsá inan fó susu-oan sira, inklui mós iha fatin servisu ne’ebé bele iha espasu ba inan sira fasilita atu bele fó susu ba sira-nia oan atividade sira ne’e la’o hela.
Iha faze preparasaun nia laran ba Orsamentu Jerál Estadu (OJE) 2024, tanba ne’e mak tenke koordena no sinkroniza programa sira atu ba oin bele la’o ho di’ak.
Ministru Koordenadór ba Assuntu Sosiál sei koordena di’ak liután hodi bele realiza asaun integradu, hahú hosi nivél ministeriál, nivél tékniku nian presiza koordena malu hodi servisu hamutuk.
Vise-Primeiru Ministru, agradese ba Banku Mundiál ne’ebé hatudu sira-nia kompromisu hodi nafatin apoiu Timor nia dezenvolvimentu iha área kapitál umanu nian.
Enkontru, ohin ho Banku Mundiál ne’e ba dala rua ona, diskute asaun sira ne’ebé presiza servisu hamutuk entre Banku Mundiál, ADB, Ajénsia UN hanesan UNICEF, WFP no Governu liuliu ministériu relevante sira atu haree asuntu sentrál hanesan, problema stunting, ne’ebé tuir dadus pursentu 47 labarik ki’ik sira ho raes badak no nútrisaun krónika.
Jornalista: Hortencio Sanchez
Editór : Zezito Silva
