Governu Kambódia komprometidu oferese tan bolsa estudu ba timor-oan

DILI, 29 agostu 2023 (TATOLI)–Governu Kambódia liuhosi Primeiru-Ministru, Hun Manet komprometidu sei kontinua fó bolsa estudu ba estudante timor-oan sira ne’ebé iha prestasaun di’ak maibé laiha kbiit atu kontinua sira-nia estudu ba nível universitáriu.
Lia hirak ne’e hato’o durante vizita Vise Primeiru-Ministru, Ministru Koordenadór ba Asuntu Ekonómiku, Ministru Turizmu no Ambiente, Francisco Kalbuadi Lay, iha kapitál Phnom Penh, hodi responde ba konvite hosi Primeiru-Ministru, Hun Manet ne’ebé foin asume kargu atuál iha loron 01 agostu 2023 no hamutuk ho delegasaun hasoru malu iha segunda (29/08).
Embaixadór Timor-Leste ba Kambódia, Hermenegildo Kupa, konsidera prezensa Vise Primeiru-Ministru Kalbuadi iha Phnom Penh ne’e pozitivu tebes, tanba antes ne’e iha relasaun di’ak ona ho Primeiru-Ministru foun Kambódia inklui governante ne’e koñese di’ak rai Kambódia kleur ona.
“Pozitivu ida mak Kambódia kontinua fó tan bolsa estudu ba ita-nia estudante timor-oan sira atu mai eskola iha ne’e,” Diplomata timor-oan ne’e informa liuhosi nota ne’ebé Agência Tatoli simu, tersa ne’e,
Antes ne’e, iha ona estudante timor-oan hamutuk na’in-10 durante ne’e eskola iha Kambódia no besik atu ramata ona.
Notísia relevante : Kambodia apoia Timor-Leste sai membru ASEAN iha 2023
Iha sorin seluk, Ministru Kalbuadi haksolok tanba hetan konvite hosi Hun Manet ne’ebé foin eleitu nu’udar Primeiru-Ministru Kambódia nian
“Oportunidade ne’e iha dadeersan ha’u hasoru ona Ministru Turizmu inklui Ministra Komérsiu, inklui hasoru malu ho Primeiru-Ministru, Hun Manet no ami ko’alia buat lubuk ida,” Ministru Kalbuadi haktuir.
Durante sorumutuk ho Primeiru-Ministru, Hun Manet, Ministru Kalbuadi konvida governante sira hosi governasaun Hun Manet atubele vizita Timor-Leste hodi explora potensialidade iha área ekonomia, komérsiu, negósiu no indústria.
“Governante hirak ne’e konkorda ona balun sei vizita ita nia-rain ho sira-nia setór privadu sira atu bele explora ita-nia potensialidade sira molok estabelese akordu bilaterál ruma iha área ekonomia no negósiu,” nia esplika.
Biban ne’e, Primeiru-Ministru, Hun Manet, hateten, Governu foun Kambódia sei kontinua nafatin tulun Timor-Leste iha área oin-oin to’o Timor-Leste sai membru plenu Asosiasaun Nasaun Sudeste Aziátiku (ASEAN, sigla inglés).
Vise Primeiru-Ministru konsidera relasaun bilaterál entre rai rua ne’e hahú metin ba daudaun ona, tanba iha líder Kambódia nian iha ASEAN mak halo Timor-Leste sai observadór permanente iha organizasaun rejionál ne’e no kontinua apoia iha setór oin-oin to’o sai membru plenu.
Hun Manet hateten, durante pandemia COVID-19 nasaun barak iha mundu inklui membru ASEAN sira hetan sofrimentu maka’as ba ekonomia ne’ebé tun, maibé Kambódia konsege hakat liu situasaun ne’e ho di’ak tanba hafoin situasaun ne’e hetan rendimentu maka’as iha setór turizmu.
“Hafoin pandemia COVID-19, turista sira ne’ebé vizita Kambódia kada tinan kuaze millaun 13. Ida-ne’e mak ita tenke aproveita inklui mós ita tenke kria solidaridade, fiar no konfiansa ne’ebé kria kleur ona, hahú hosi eis Primeiru-Ministru Hun Sen ho maun Primeiru-Ministru, Kay Rala Xanana Gusmão koñese malu iha tinan 2002 to’o ohin loron, ha’u mai atu kontinua de’it, tanba ohin loron nia oan mak sai Primeiru-Ministru hanesan mós ha’u nia kolega rasik. Ha’u mós hanesan konvidadu dahuluk mai vizita Kambódia hafoin simu knaar foun ne’e,” nia esplika.
Jornalista : Antónia Gusmão
Editora : Julia Chatarina

