DILI, 29 agostu 2023 (TATOLI)—Parlamentu Nasionál (PN), tersa ne’e, liuhosi reuniaun plenária aprova pedidu asentimentu hodi autoriza Prezidente Repúblika (PR), José Ramos Horta, hala’o vizita Estadu ba Cuba ho Estadu Unidu Amérika (EUA), ho rezultadu votasaun a-favór 56, kontra 0 no abstensaun rua (2).
“Nune’e, pedidu asentimentu ne’e aprovadu,” Prezidente PN interina No atual Primeiru Vise prezidente PN, Maria Terezinha Viegas, iha pleária PN.
Tuir ajenda PR nia vizita Estadu ba Habana-Cuba entre 12 no 16 setembru 2023, hodi ba partisipa iha simeira G77+Xina.
Nune’e mós vizita Estadu ba entre 17 no 24 setembru 2023, hodi partisipasesaun Asembleia Jerál Organizasaun Nasaun Unida (ONU) ba dala 78.
Parlamentu Nasionál tuir termu númeru 1 artigu 80 no alínea h) númeru 3 artigu 95 konstituisaun fó asentimentu dezlokasaun Prezidente Repúblika.
Deputadu Fretilin, Joaquim dos Santos, kestiona PR nia viajen kontinua sai hela de’it ba rai-li’ur, nune’e presiza hatene efeitu rezultadu polítiku no ekonómiku hosi viajen sira-ne’e, despeza Estadu liga ba serbisu diplomásia Ministériu Negósiu Estranjeiru no Kooperasaun (MNEK) mak saida.
Jornalista : Nelson de Sousa
Editór : Cancio Ximenes
