Governu sei elabora planu dezenvolvimentu komunitária no munisipál
COVALIMA, 30 agostu 2023 (TATOLI)– Governu liuhosi Sekretáriu Estadu Dezenvolvimentu Lokál, Mateus dos Santos Tallo, sei elabora planu dezenvolvimentu komunitária no planu dezenvolvimentu munisipál iha Timor-Leste.
“Ami sei elobora planu dezenvolimentu komunitáriu no planu dezenvolvimentu munisipál oinsá ita atu hahú meloria dezenvolve nivel suku no munisípiu. Ita presiza elabora dokumentu estratéjiku nune’e ita bele foku ba infraestrutura bázika no ekonómia nivél komunitáriu,” Mateus dos Santos Tallo hateten ba jornalista sira hafoin komemorasaun loron konsulta populár ba dala-24 (30 agostu 1999-30 agostu 2023) iha Kampu Suai Loro, kuarta ne’e.
Atu elabara planu dezenvolvementu komunitária no planu dezenvolvementu munisipál, tinan oin Governu sei halo Estudu, nune’e bele hahú servisu dezenvolve suku no munisípiu.
Governu presiza halo estudu para atu hatene problema kada suku no aldeia ne’ebé potensialidade ba sa ida, ho rekursu ne’ebé hodi prepara ba eleisaun kamara munisipál.
Bazeia ba dadus sekundáriu ne’ebé hautudu katak populasaun maiória 71% ne’ebé hela iha área rural, entaun presiza hahú elabora dokumentu estratéjiku, hafoin bele lori dezenvolve ba povu ho integradu.
Munisípiu Covalima ho nia postu administrative Fatululik, Fatumea, Fohorem, Maucatar, Tilomar, Suai no Zumalai iha suku 30 no aldeia 148.
Entertantu, Covalima hanesan munisípiu ida hosi Timor-Leste, lokalizadu iha parte ne’ebé fronteira ho Munisípiu Ainaro, tasi Mane (sul), Indonézia (oeste) no munisípiu Bobonaro (norte).
Munisípiu Covalima área 1,206.66 km2, grupu populasaun ida-ne’e, koalia dalen Tetun, Tetun Terik, Bunak no Kemak.
Jornalista : Celestina Teles
Editór : Cancio Ximenes
