Povu determina nia ukun rasik aan iha konsulta populár 30 agostu 1999
COVALIMA, 30 agostu 2023 (TATOLI)–Sekretáriu Estadu Dezenvolvimentu Lokál, Mateus dos Santos Tallo, hateten iha loron konsulta populár 30 agostu 1999 ne’e povu determina nia ukun rasik aan iha sentru votasaun liuhosi ezerse sira-nia votu hodi korre aan hosi inimigu atu dezenvolve Timor-Leste.
“Ita hotu determina ita-nia dalan úniku ba ukun rasik aan, kore aan hosi inimigu hodi dezenvolve rai doben Timor-Leste. Ohin loron, 30 agusto 2023, ita hakat ona tinan 24 hosi pasadu, ita alkansa ona ba oin nasaun nia distinu iha ita hotu nia liman,” Mateus dos Santos Tallo hateten liuhosi nia diskursu iha komemorasaun loron konsulta populár ba dala-24 (30 agostu 1999-30 agostu 2023) iha kampu Suai Loro, kuarta ne’e.
Ho loron istóriku ida-ne’e, joven-sira atu halo reflesaun ba istória pasada ne’ebé nakonu ho memória moruk, falun metin ho nakukun ne’ebé ohin loron sente nia midar.
“Ohin loron, ita gojz ukun rasik aan la’ós monu hosi lalehan maibé mai hosi esforsu ita-nia inan-aman veteranu, lia-nain, ferik-katuas sira no inklui ita-nia maun sira-ne’ebé sakrifika sira-nia vida laiha rezerva ba rezultadu konsulta popular,” nia dehan.
Loron istótiku ida-ne’e, sai hanesan momentu refletivu espesiál ba timoroan sira oinsá atu lolo liman ba malu, hametin unidade hodi hakat ba dezenvolvementu Timor-Leste hahú hosi munisípiu Covalima.
Reprezentante Administradór Munisípiu Covalima, Francisco de Jesus Alves, hateten komemorasaun loron konsulta populár sai hanesan reflesaun, tanba iha tinan 24-liu ba povu hamrik hodi deside nia future, nune’e tenke matein pás no estabilidade.
“Mantein pás no estabilidade iha ita-nia nasaun loron konsulta populár tinan 24 ba kotuk, ita hamrik hamutuk hodi deside futuru sai hanesan nasaun. Ohina, ita selebra ida-idak atu halo reflesaun saida mak halo ona ba povu. Tanba ne’e, ohin, ita hotu hodi selebra loron konsulta populár atu fanu ita-nia konxiénsia, ita deside ukun rasik aan,” nia dehan.
Komemorasaun loron konsulta populár iha munisípiu Covalima hala’o ho atividade kompetisaun Kurrida Cavalho, animasaun dansa kultura, feira no seluk tan ne’ebé autoridade Covalima aloka orsamentu $7,878,75 ne’ebé aloka boot-liu ba atividade kompetisaun Kurrida Cavalho, kuaze 4000-resin ne’ebé fahe ba preparasaun fatin aloka $ 900 no orsamentu fó prémiu ba vensedór hosi klase B, C, D no E aloka hamutuk $3,525.
Jornalista : Celestina Teles
Editór : Cancio Ximenes
