SEAKLN: Liuhosi konsulta populár povu deside kaer kuda talin rasik
DILI, 30 agostu 2023 (TATOLI)—Sekretáriu Estadu Asuntu Kombatente Libertasaun Nasionál (SEAKLN), César dos Santos da Silva, hateten Timor-Leste korre-an hosi invazaun Indonézia la’ós ho forsa mak manán funu maibé ho povu nia votu liuhosi konsulta populár 30 agostu 1999 mak deside hamriik kaer kuda talin rasik.
“Ohin, loron 30 agostu 2023, loron importante tebes tanba loron ida ohin mak povu Timor tomak hamriik hodi deside destinu ba ukun rasik-aan. Tanba ne’e, mai ita hamutuk fó valór no dignifika ita-nia eroi sira-ne’ebé fó nia aan mate to’o balun ruin seidauk hetan. Funu ida-ne’e la’ós de’it ho forsa maibé liuhosi votu ne’ebé povu fó mak deside referendu ba indenpendensia Timor-Leste nian iha 30 agostu 1999,” Governante ne’e hateten ba Agência Tatoli, hafoin partisipa misa agradesimentu ba komemorasaun loron konsulta populár ba dala-24 (30 agostu 1999-30 agostu 2023) iha igreja Balide, kuarta ne’e.
Ho povu Timor nia unidu no kompromisiu mak iha 30 agostu deside hodi ukun rasik-aan, Veteranu ne’e hateten, konsulta popular ne’e Indonézia rekoñese katak timoroan maioria hili dalan ukun rasik-aan no lakohi integrasaun ho Indonézia.
Nune’e, iha 04 setembru 1999, Sekretáriu Jerál Nasaun UNida, Kofi Annan, anunsia rezultadu Konsulta Populár ba mundu tomak katak ema 94.388 (21,50%) mak vota ba proposta autonomia ne’ebé aprezenta hosi Indonézia no ema 344.580 (78,50%) mak rezeita hamutuk ho Indonézia hodi hili ukun rasik aan.
Ho rezultadu ne’e, Sekretáriu Estadu Asuntu Kombatente Libertasaun Nasionál (SEAKLN) konsidera katak konsulta populár fó oportunidade ba timoroan sira atu hili sira-nia destinu rasik ne’ebé ikus manán funu.
“Loron 30 agostu ita tenke konsidera nu’udar loron ida importante, tanba loron ida-ne’e mak responde timoroan hotu nia terus, susar, raan fakar no mate hodi atinje nia objetivu ida ba ukun rasik-aan,” nia dehan.
Ho indenpendénsia ida-ne’e, Sekretáriu Estadu Asuntu Kombatente Libertasaun Nasionál (SEAKLN) husu ba joven atu kaer metin unidade nasionál hodi kontribui pás estabilidade ba rai doben ida-ne’e.
“Asegura no kaer metin unidade nasionál hodi nune’e ita lori dezenvolvimentu rai no povu ida-ne’e ba futuru ne’ebé di’ak no asegura ninia dignidade iha mundu nia matan. Maibé husu joven atu kontinua banati buat ne’ebé mak eroi sira rai hela hahú hosi 1975 to’o 1999. Tanba liuhosi ida-ne’e mak bele dehan joven futuru ba nasaun, nune’e presiza koñese prinsípiu no valór nasaun Demokrátiku nian iha Timor-Leste,” nia dehan.
Jornalista : Osória Marques
Editór : Cancio Ximenes
