Verifikasaun dadus veteranu rejistadu 2009, SEAKLN valida ona 75%
DILI, 30 agostu 2023 (TATOLI)—Sekretáriu Estadu Asuntu Kombatente Libertasaun Nasionál (SEAKLN), César dos Santos da Silva, hateten prosesu verifikasaun ba dadus veteranu rejistadu 2009 falta 25% ne’e, Ministériu Asuntu Kombatente Libertasaun Nasionál (MAKLN) hamutuk ho nia ekipa verifikasaun sei verifika fali iha setembru ne’e.
“Prosesu verifikasaun ba dadus veteranu rejistadu 2009 nian ami valida ona 75% ne’ebé ekivale ba 93.000 hosi ema 124.680 no hela 25% ho ema 30.000 hanesan ne’e. Ida-ne’e kuandu Prezidente Repúblika promulga Orsamentu Retifikativu mak ami hahú verifikasaun iha setembru ne’e,” César dos Santos da Silva hateten ba Agência Tatoli iha igreja Balide, kuarta ne’e.
Governante ne’e hateten, dadus 25% ne’e sei konklui iha fulan-dezembru no kontinua kedas prosesu validasaun ba dadus refere.
“Ita tenke konklui tinan ne’e, nune’e tinan oin ita tenke halo ona pagamentu ba veteranu ne’ebé merese duni atu hetan pensaun. Maibé molok dezloka, iha 04 setembrum depois de içar bandeira ami sei iha reuniaun nível ministériu nian para ami prepara dezloka ba munisípiu hotu-hotu iha Timor-Leste,” César dehan.
Liuhosi konteúdu ne ebé mensiona iha Estatutu Kombatente Libertasaun Nasional, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne ebé rejista ha tinan 2009.
Jornalista : Osória Marques
Editór : Cancio Ximenes
