Maioria formandu husi SOLS hetan ona empregu
DILI, 31 agostu 2023 (TATOLI) – Sentru formasaun Science of Life System (SOLS) ne’ebé harii iha 2006 forma ona timoroan hamutuk besik rihun 100. Husi númeru ne’e, dadus estatístika husi sentru ne’e hatudu katak formandu 80% mak hetan ona empregu.
SOLS hanesan organizasaun ne’ebé mai ho objetivu atu kapasita formandu sira iha lia-inglés, administrasaun, teknolojia informátika (komputadór) no koñesimentu valór direitu umanu nian.
Ezisténsia SOLS ne’e mai husi inisiativa profesór sira husi Malázia no Kamboja. Hahú uluk ho formandu na’in-24 ho intensaun atu prepara sira kompete iha merkadu traballu iha rai-laran no li’ur.
Diretór SOLS, Mateus Carlos Sarmento, haktuir katak SOLS nia prezensa iha ona munisípiu sira no instala ona sentru hamutuk 50. “Ita-nian estudante kuaze 80% maka hetan ona serbisu iha rai-laran no balun bá serbisu iha rai-li’ur hanesan Austrália, Koreia no Inglaterra”, dirijente informa asuntu ne’e iha Becora, ohin.
Formasaun sira ne’ebé maka SOLS disponibiliza ne’e hafahe ba parte rua – ba nivel I, formandu sira partisipa kursu iha munisípiu durante fulan neen no hetan tiha sertifikadu mak hakat bá nivel tuirmai. Ba nivel II, formandu sira partisipa kursu iha sentru formasaun Becora durante fulan neen tan, nune’e bele prepara sira sai formandór iha futuru. Formasaun ne’e reforsa tan ho kursu komputadór nivel I.
Formadór sira ne’ebé mak hanorin iha sentru SOLS sira hamutuk 310, iha ne’ebé na’in-sia ema estranjeiru (mai husi Malázia no Kamboja, Japaun no Laos) no restante timoroan.
“Ita iha formadór husi li’ur hamutuk na’in-sia. Sira mai apoia formasaun ne’e gratuita de’it”, dehan.
Mateus Sarmento salienta katak formasaun naun-formál ne’ebé SOLS fó ba timoroan dezde tinan 17 ne’e seidauk hetan atensaun husi Governu no seidauk halo kooperasaun ho Ministériu Edukasaun. Tanba ne’e dirijente SOLS husu ba IX Governu atu apoia no fasilita fatin ruma ba sira nune’e bele utiliza ho adekuadu iha futuru.
SOLS daudaun ne’e aluga hela fatin kada fulan ho kustu rihun ida hodi disponibiliza formasaun. Osan sira ne’e sira hetan husi akordu kooperasaun ho instituisaun Estadu no ajénsia internasionál atu disponibiliza formasaun ba sira-nian funsionáriu sira.
Jornalista: Tomé Amado
Editora: Maria Auxiliadora
