Manan prémiu Ramon Magsaysay Filipina, Ego Lemos: “surpreza ida”
“Ami sei halo servisu barak liu iha seguransa ai-han tanba baze soberania ai-han mak bee, fini no rai. Ida ne’e mak durante ne’e ami luta maka’as”
DILI, 31 agostu 2023 (TATOLI) – Promotor Permakultura Timor-Leste (Permatil), Ego Lemos, hanesan mós Diretór-ezekutivu Organizasaun Naun-Governamentál, sai vensedór ba prémiu Ramon Magsaysay 2023 husi Filipina, iha kategoria Seguransa Alimentar.
Ego Lemos sai vensedór ka manan-na’in ba prémiu ne’e, tuir Prezidente Fundasaun Ramon Magsaysay, Aurelio Montinola, iha serimónia anunsia rezultadu ne’ebé halao iha Filipina, katak bazea ba ba servisu Permatil ne’ebé durante ne’e halo promosaun ba métodu agrikultura tradisionál liuhusi konservasaun bee no jardin eskolár hodi kontribui ba seguransa no soberania alimentár iha Timor-Leste.
Diretór-ezekutivu Permatil, Ego Lemos, iha entrevista ho Tatoli, haktuir, nomesaun ne’e hanesan “surpreza ida” tanba durante ne’e laiha intensaun atu manan prémiu ruma.
Dirijente ne’e haktuir, iha fulan abril liu ba ekipa ida husi Filipina halo vizita mai Dili hodi halo entrevista ho grupu oi-oin kona-ba servisu ne’ebé Permatil halo, liu-liu implementasaun programa to’os eskolar no konservasaun bee.
“Ha’u la hatene naran tama iha lista tanba ne’e segredu ema nian. Maibé, hafoin ha’u rona naran tama iha lista horseik lokraik, bainhira ekipa husi Filipina husu atu manda fotografia ba sira. Husi ne’e mak ha’u foin hatene katak ha’u-nia naran mós tama hotu iha lista premiadu. Ne’e hanesan surpreza ida mai ha’u”, Ego Lemos informa ba Tatoli, ohin, iha Farol, Dili.
Nia konta tuir katak iha fulan kotuk ekipa husi Filipina halo kontaktu ho nia hodi husu tan pergunta balun liuhusi zoom meeting (enkontru virtuál), ho objetivu atu halo avaliasaun ba servisu ne’ebé organizasaun halo ba komunidade sira iha área rurál.
Ego Lemos konsidera prémiu ne’e hanesan rekoñesimentu ida ba servisu ne’ebé durante ne’e ekipa Permatil kontribui konservasaun bee no hein katak iha futuru sei hetan apresisasaun di’ak liutan.
Hafoin manan prémiu ne’e, dirijente ne’e promete sei kolabora ho Estadu no Governu hodi tulun povu sai husi ki’ak no mukit liu-liu atu tulun komunidade asesu ba ai-han nutritivu nune’e bele kontribui ba hamenus má nutrisaun no inseguransa alimentar nasaun ne’e.
“Ami sei halo servisu barak liu iha seguransa ai-han tanba baze soberania ai-han mak bee, fini no rai. Ida ne’e mak durante ne’e ami luta maka’as”, nia promete.
Ego Lemos mak timoroan datoluk ne’ebe manan prémiu Ramon Magsaysay, hafoin iha tinan hirak liu ba mana nona husi eis-Prezidente Parlamentu Nasionál, Aniceto Guterres, no Mana Lu, fundadora ISMAIK.
Iha tinan ne’e Fundsaun Prémiu Ramon Magsaysay, hili ema haat hodi manan prémiu ne’e iha kategoria diferente.
Iha kategoria saúde manan husi indianu, Ravi Kannan R, iha kategoria edukasaun manan husi Korvi Rakshand husi Bangladesh, iha kategoria Feto iha Paz, manan husi Miriam Coronel-Ferrer, husi Filipina no Ego Lemos manan iha kategoria seguransa alimentár.
Tuir ajenda, serimónia ofisial entrega prémiu ne’e sei realiza iha 11 novembru tinan ne’e iha Filipina.
Prémiu Ramon Magsaysay mak prémiu ne’ebé atribuidu ba individu ka organizasaun sira iha rejiaun Ázia ne’ébé sai ezemplu lideransa transformadora no iha paixaun bo’ot hodi halo servisu sira ne’ebé afavor ba povu nia moris di’ak.
Durante ne’e Permatil implementa ona to’os eskolar (jardim escolar) 254 iha eskola primária hotu iha nasaun ne’e, menus Oé-Cusse, maibe Ego Lemos konsidera númeru ne’e sei kiik tanba tuir dadus husi Ministériu Edukasaun, iha Timor-Leste iha Eskola Primária besik 1.500 no halo ona konservasaun bee iha aldeia 60 iha territóriu nasionál no fó ona benefísiu komunidade 500.
Jornalista: Afonso do Rosário
Editór: Rafael Ximenes de A. Belo
