DILI, 31 agostu 2023 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, asina akordu ho dirijente mídia imprime lima hanesan diáriu Timor-Post, Díli Post, INDEPENDENTE, Jornál Nasional Diariu no Suara Timor Loro Sa’e (STL), atu distribui sira nia jonál ba munisipiu 12 la inklui RAEOA no Atauro.
Objetivu hosi akordu ne’e atu povu iha munisípiu 12 inklui to’o iha postu administrativu atu povu sira iha área remota bele akompaña informasaun kona-ba prosesu dezenvolvmentu Timor-Leste nian no servisu Governu dasia
Nia dehan, iha IX Governu Konstituisionál liuhosi Sekretária Estadu Komunikasaun Sosiál (SEKOMS), iha polítika fortalesimentu meiu komunikasaun sosiál sira, atu nune’e mídia imprime no mídia plataforma sira atu bele oferese inforasaun ne’ebé kualidade ba povu hotu bele akompaña prosesu dezenvolvimentu ne’ebé agora daudaun lao hela, tanba mídia hanesan pilár importante iha demókrasia.
Tanba ne’e, SEKOMS hahú asina uluk akordu iha faze dahuluk ho mídia imprime lima oinsá promove informasaun hosi nasionál to’o área rurál.
“Ohin ita asina akordu servisu hamutuk atu nune’e jornál bele to’o iha públiku liuliu ba munisípiu sira Postu Administrativu atu nune’e sira mós bele akompaña informasaun iha nasionál no bele akompaña informasaun mundu nian”, SEKOMS Expedito Dias iha nia intervensaun durante asina akordu ho media imprime lima ba distribuisaun jornál ba munisípiu, ne’ebé halo iha salaun Prezidénsia Konsellu Ministru, Palásiu Governu, kinta ne’e.
Nia dehan, maske iha era dijitál ema konsidera ezisténsia jornál la iha ona maibé iha era dijitál mós jornál sei kontinua eziste nafatin.
Tanba kuandu eventu ka akontsimentu ida akontese ohin, ema halo live streaming, live ne’e ohin bele hotu, maibé jornál ema hola no sei kontinua lee hodi relembra fali.
“Ita hein katak ita nia populasaun sira iha área rurál sei nafatn presiza jornál”, nia afirma.
Governante ne’e hateten, ho apoiu Governu nian ba midia sira ne’e ho forma sira hanesan ne’e la signifika atu intervene produtu jornalístika hosi mídia sira-nian.
“Maibé ho apoiu sira ne’e hodi enkoraza mdia sira atu fortifika sira-nia servisu ba konstrolu sosiál, nafatin buat ne’ebé Governu halo la los kontinua fó hanoin hadia sai di’ak liután”, nia adianta.
Expedito mós husu ba mídia nain sira ho apoiu sira hanesan ne’e sei kontinua nafatin tanba ne’e husu midia nain hira tenke haree ona bem estar sira nian jornalista sira.
“Governu sei kontinua apoia midía sira, maibé nain ba mídia sira tenke tau ona atensaun iha sira-nia jornalista nian saláriu, sé kompara tinan uluk saláriu ki’ik maibé ho apoiu ida ne’e bele muda jornalista sira nian saláriu, maibé ida ne’e depenede ba ita bo’ot sira nia polítika”, governante ne’e afirma.
SEKOMS mós husu ba mídia sira atu kontinua tau importánsia ba produtu jornalístiku hodi hadia kualidade produtu jornálistiku tanba dala barak públiku sempre kestiona produtu liuliu inforsaun sira ne’ebé ita públika.
Iha fatin hanesan, Chef Of Ezekutive (CEO) STL , Salvador Januario Soares Ximenes, hateten, STL agradese ba kooperasaun SEKOMS ho mídia imprime sira hodi distribui jornál sira ba to’o munisípiu hodi komunidade sira iha munisipiu to’o postu bele akompaña notísia liuhosi jornál sira.
“Agardese ba Governu liuliu parte SEKOMS primeira-vez halo programa kooperasaun ho mídia imprime sira hodi distribui jornál to’o ba munisipiu to’o postu administrativu sira, programa ida ne’e di’ak para halo ami mídia sira hakmatek oituan”, nia dehan.
Nia hateten, Governu presiza fó apoiu ho forma sira hanesan hodi tulun mídia sira halo servisu públikasaun notísia di’ak liután no rekopera fali servisu mídia imprime sira tanba durante pandemia Covid ne’e mídia barak mak moris iha agonia laran.
Maske ho situasaun ne’e maibé mídia konvensionál sira kontinua eziste hodi fó asisténsia liuhosi públikasaun notísia sira.
Jornalista: Natalino Costa
Editór : Zezito Silva
