COVALIMA, 31 agostu 2023 (TATOLI)- Komandante PNTL Covalima, Superintendente Calisto Gonzaga hateten, Kazu joven-sira ataka malu hamosu insidente iha aldeia Bulu, postu Zumalai, munisípiu Covalima, rezulta joven na’in-ida kanek grave, nune’e suspeitu inisiál OMS kumpre ona prizaun preventiva.
“Kazu insidente ita la espera joven-sira ataka malu, vítima na’in-ida kanek grave, iha postu Zumalai, nune’e suspeitu OMS kumpre ona pena prizaun preventive,” Calisto Gonzaga hateten ba jornalista sira iha salaun Kovek, Bairru Costa, kinta ne’e.
Joven sira ataka malu iha postu Zumalai halo vítima na’in-ida kanek grave, nune’e iha tempu ne’eba PNTL halo sukoru lori vítima mai iha óspitál referál Suai hodi hala’o tratamentu saúde.
Hafoin insidente ne’e akontese, suspeitu entrega aan ba Komandu Polísia Nasionál Timor-Leste (PNTL), halo investigasaun no Tribunál Distritál Suai aplika ona prizaun preventiva ba suspeitu ho inisial OMS no na’in-haat sira seluk tama iha prosesu normál
“Hahú iha tempu ne’eba, ita halo sukoru no movimenta vitima mai ospital ita hateten ba suspeitu integra aan mai iha polísia ita halo nia prosedimentu ita konklui no tribunál aplika ona medida koasaun ema nain ida ho inisial OMS ne’ebé hetan prizaun preventiva” nia dehan.
Kamandante mós fó hanoin ba joven-sira iha área rurál no kapitál favór atu limita halo agresaun fízika entre joven sira iha bairru, nune’e kria kondisaun di’ak iha bairru ne’ebé imi hela ba.
“Ita fó hanoin ba joven sira iha área rurál atu limita agresaun fízika, imi ho pesoál sira seluk sei lakon oportunidade no lakon tempu,” nia hateten.
Tuir dadus, membru PNTL iha munisípiu Covalima hamutuk 158 ne’ebé balun reforma ona, balun sei reativa atu trata prosedimentu hodi trata ho dignu tuir nia rejimentu no regra atu reforsa servisu hodi koloka ba iha OPS no ba iha fronteira.
Jornalista : Celestina Teles
Editór : Cancio Ximenes
