VIQUEQUE, 01 setembru 2023 (TATOLI)—Abitante aldeia neen hosi suku Macadique, postu administrativu Uatulari, munisípiu Viqueque entusiazmu partipa disaminasaun prosesu eleisaun suku hosi Komisaun Nasionál Eleisaun (CNE, sigla portugés).
“Ami sente kontente bainhira ekipa CNE desloka mai ami-nia k’nua iha área rurál hodi fó edukasaun sívika no loke ami-nia hanoin hodi kompreende prosesu hili líder suku, tanba durante ne’e ami hela liu iha k’nua, entaun ami labele asesu informasaun kona-ba prosesu eleisaun suku hodi bele hili líder ne’ebé iha koñesimentu hodi tau matan ba ami povu,” Eleitór suku Macadique, Lino Tane Amaral, hateten hafoin ramata atividade edukasaun sívika ba datoluk, iha aldeia Kuru-Boru, sesta ne’e.
Durante ne’e, abitante lokál nunka partisipa iha edukasaun sívika, nune’e foin mak bele partisipa fali. Aleinde ne’e, eleitór hosi aldeia neen sente triste tanba Governu impede prosesu estabelesimentu suku foun tanba aldeia neen iha suku Macadique iha liu foho, maibé foin lalais hetan ona aprovasaun hosi Konsellu Ministru no fó sai ona iha Jornál Repúblika katak aldeia neen sai ona suku foun ida ho naran suku Macadique Uaitame.
“Governu impede katak sei haree prosesu admistrasaun, signifika tinan ida-ne’e ami labele partisipa eleisaun suku. Ida-ne’e maka halo ami triste ba desizaun Governu nian,” nia akresenta.
Notísia relevante : CNE fó edukasaun sívika ba eleitór-sira iha Viqueque
Desizaun deside suku bazeia ba lei suku númeru 9/2017 ne’ebé hatúr iha artigu 91, fó kompetensia Ministru Adiministrasaun Estatál maka deside suku.
Iha fatin hanesn, Diretór Nasionál Edukasaun Sivíka Partidu Polítiku Dokumentasaun no Informátika hosi CNE, Carlos Alves Lopes, dehan, pare komisaun deside realiza atividade edukasaun sívika iha área rurál hodi prátika prosesu eleisaun suku ba inan aman no estudante sira ne’ebé durante ne’e seidauk partisipa iha edukasaun sívika.
“Ami destaka mai iha foho hodi disamina prosesu eleisaun ba abitante sira iha área rurál atu sira bele kompreende prosesu hili líder suku. Tanba aldeia ne’e Governu dekreta ona sai suku no sai ona iha Jornalál Repúblika nune’e ita akompaña karik suku foun tolu iha postu Uatulari, hanesan Macadique de Baixo, Macadique de Cima no Macadique Uaitame tama ona sistema STAE, entaun tinan ne’e sira partipa eleisaun suku, maibé karik seidauk tama sistema signifika sei halo iha tinan oin, nune’e ita hein de’it prosesu. Bainhira suku foun tolu ne’e iha sistema ona sistema, maka inan aman sira bele prepara-an kandidata-an ba xefe suku no xefe aldeia inklui delegadu sira,“ nia tenik.
Nune’e mós, Xefe suku Macadique, Afonso dos Reis, haktuir, iha mandatu VIII Governu dekreta ona proposta suku Macadique atu loke suku foun iha loron, 03 maiu 2023 hodi aselera prosesu dezenvolvimentu ba abitante sira no hakbesik atendimentu administrasaun suku ho fasil.
“Tinan ida-ne’e ami seidauk hatene loos partisipa eleisaun ka lae no ida-ne’e maka sai preokupasaun ba ami no ami-nia povu sira. Kona-ba loke suku foun tolu ne’e ami simu ona sertifikadu, durante ne’e ha’u esforsu hodi forma suku foun hodi alarga dezenvolvimentu, maibé agora la partisipa eleisaun suku sai problema ba ami líder suku,” nia realsa.
Ho nune’e nia husu ba Ministru Administrasaun Estatal atu halo klarifikasaun ba povu suku foun tolu ne’ebé iha postu Uatulari hodi povu bele kompreende karik tinan ida-ne’e la partisipa eleisaun suku.
Tuir dadus suku Macadique ho ninia aldeia hamutuk 21, nune’e fahe ba suku foun tolu maka hanesan Macadique de Cima ho aldeia ualu ho totál uma-kain 420 no abitante na’in-600, Macadique de Baixo ho aldeia hitu hi uma-kain 400 no abitante na’in-650 no Macadique Uaitame ho aldeia hamutuk neen ho uma-kain 340 no abitante totál na’in-899.
Atividade edukasaun sívika iha aldeia neen hetan partisipasaun hosi ema na’in-neen, kompostu hosi Administradór postu, Autoridade Seguransa Eskuadra Polísia Uatulari, inan aman, estudante.
Jornalista : Vitorino Lopes da Costa
Editora : Julia Chatarina
