VIQUEQUE, 01 setembru 2023 (TATOLI)—Administradór munisípiu Viqueque, Januário Soares ‘Bolly’, prefere harii sentina liuhosi Programa Mão de Obra Postu Administrativu (PMOPA) ba povu kbiit laek.
“PMOPA hanesan oportunidade ne’ebé ha’u fó ba postu sira hodi implementa tanba programa sira-ne’e suku maka propoin bazeia ba sira-nia prioridade balun halo limpeza. Maibé, ha’u haree limpeza ladún pertinente ba programa ida-ne’e, nune’e ha’u fó hatene ona ba xefe suku, programa ne’e bele ajuda ita-nia abitante sira ne’ebé laiha kbiit kehe posu sentina nian,” Autoridade munisípiu Viqueque hateten ba Agência Tatoli, iha postu Viqueque Vila, sesta ne’e.
Notísia relevante : Asembleia postu Viqueque-vila diskute programa implementasaun PMOPA
Autoridade hakarak harii sentina tanba antes ne’e parte munisípiu deklara ona área la soe fo’er arbiru (ALFA), maibé nota katak abitante balun iha suku sira laiha kbiit harii sentina.
“Ha’u haree programa ALFA ne’e iha abitante balun laiha sentina tanba sira forsa ekonomia la sufisiente. Entaun, liuhosi programa ne’e ita bele mobiliza komunidade kehe posu sentina no haris fatin hodi ita labele soe foer iha zona livre sira. Maski labele responde hotu, maibé ita bele rezolve oituan,” nia akresenta.
Autoridade munisipál ne’e konsidera, programa ne’e ba limpeza ladún benefisia povu, tanba ne’e presiza halo mudansa ba programa.
“Ba futuru bainhira PMOPA sei iha, ha’u sei koloka ba postu hodi hadi’a dalan sira liga iha bairru laran, do que ita husu hela de’it ba Governu, nune’e ita-nia abitante sira bele asesu,” Administradór tenik.
Aleinde ne’e, implementasaun PMOPA ba tinan 2023 iha faze dahuluk, postu Lacluta maka finaliza ona maibé postu Uatulari, Uatucarbau no Ossu seidauk.
“Entaun implementasaun faze daruak nian seidauk bele tanba sira tenke hatama relatóriu faze dahuluk maka foin bele implementa faze tuir mai,” Januário Soares salienta.
Implementasaun programa ne’e kada suku iha grupu lima, ne’ebé grupu ida integra traballadór na‘in-20. Impelementasaun PMOPA ho tipu atividade hanesan limpeza jerál, hamos baleta laran, kuda ai-oan no aterru dalan kuak sira.
Implementasaun programa ne’e, kada postu hetan alokasaun orsamentu $100.000, ne’ebé sei selu bazeia ba progresu ba faze dahuluk 50% no faze daruak 50%.
Jornalista : Vitorino Lopes da Costa
Editora : Julia Chatarina
