BOBONARO, 01 setembru 2023 (TATOLI)-Bispu Dioseze Maliana, Dom Norberto do Amarál no Bispu Dioseze Baucau, Dom Leandro Maria Alvez, triste haree joven sira kontinua tuda-malu no asalta malu iha fatin-fatin.
Mensajen Lideransa Uma Kreda Timor-Leste sira hato’o iha selebrasaun misa agradesimentu ordenasaun Bispu Dioseze Baucau, Dom Leandro Maria Alvez, ne’ebé realiza iha Igreja Parókia Bobonaro Vila, sesta ne’e.
Bispu Dioseze Maliana, Dom Norberto do Amarál, hateten iha buat ruma la di’ak mak joven sira prátika aktu sira ne’e to’o kria instabilidade iha rai-laran.
“Tanbasá mak ita tuda-malu arbiru de’it, ha’u hanoin buat balu ladi’ak, buka ba atu tau di’diak buat ne’ebé ohin Dom Leandro dehan ne’e hadomi, atubele belit iha ita nia fuan ida ne’e hodi bele habelar ba maun-alin sira,” Bispu Dioseze Maliana ne’e hateten.
Prezidente Konferénsia Episkopál Timorense ne’e dehan, joven sira presiza kontente no haksolok hamutuk iha sosiedade.
“Mai ita fó liman ba malu, kaer-liman ba malu nafatin hodi haree malu hanesan maun ho alin, ho inan-feton hodi hadomi malu di’diak hanesan Jesus hadomi ita,” Bispu Dioseze Maliana ne’e fó hanoin ba joven sira.
Bispu Dioseze Baucau, Dom Leandro Maria Alvez, fó hanoin katak São Paulo hanorin sarani sira labele halo violénsia no labele uza violénsia atu rezolve problema.
“Hanesan horikalan ita rona ema tuda-malu, baku-malu, duni-malu, São Paulo husu ita atu husik tiha violénsia sira hanesan ne’e tanba hahalok ladi’ak,” Bispu Dioseze Baucau ne’e fó hanoin.
Notísia relevante: Bispu Norberto husu sarani sira nafatin fiél ba Sagrada Coração de Jesus
Jornalista: Sérgio da Cruz
Editór: Evaristo Soares Martins
