BOBONARO, 01 setembru 2023 (TATOLI)-Hafoin eleitu ba Bispu Dioseze Baucau iha loron 26 abril 2023, Dom Leandro Maria Alvez, hala’o misa agradesimentu iha Parókia Nossa Senhora Imaculada da Conceição Bobonaro, munisípiu Bobonaro ho família, autoridade sivíl-militár no sarani sira hotu.
Iha omília, Bispu Dioseze Baucau, Dom Leandro Maria Alvez, hateten misa ne’e realiza atu hasa’e agradesimentu ba Maromak ne’ebé haraik ona karan vokasaun ninian.
“Ita-nia hamutuk iha-ne’e tanba ita-boot sira-nia domin ba grasa vokasaun ninian, ita-boot sira hatudu domin ne’ebé kle’an tebes ba Nai Maromak rasik, tanba grasa vokasaun ne’e Nai Maromak ninian, tan ne’e ita selebra liturjia ida ne’e, maske ha’u moris no boot iha Ermera, raan fakar iha Ermera, maibé ha’u-nia aman ema Bobonaro,” Dom Leandro hateten iha Maliana, sesta ne’e.
Dom Leandro agradese ba Bispu Dioseze Maliana, Dom Norberto do Amarál, pároku Bobonaro, família hosi uma-lisan Thama-Op, no sarani sira hotu ne’e ho laran ruak kontribui no apoia hodi realiza misa agradesimentu ne’e.
Bispu Dioseze Maliana, Dom Norberto do Amarál, reforsa selebrasaun liturjia ne’e katak Dom Leandro atu buka nia hún mai hosi ne’ebé.
“Nia hún ida uma-kain Thama-Op, ita agradese ba Dom Leandro, vokasaun ida-ne’e nai Maromak haraik ba ita hotu-hotu,” Amu-Lulik ne’e dehan.
Prezidente Konferénsia Episkopál Timorense ne’e subliña, eventu ne’e importante tebes ba sarani hotu-hotu nu’udar dalan ida-ne’ebé atu hili sai mu-lulik.
Biografia
Dom Leandro Alves hamutuk maun-alin na’in-sia, komposta hosi mane na’in-lima no feto na’in-haat, hahú estudu iha tinan-1990 to’o 1993 iha SMAK, Santo Yoseph, Dili, 1993-1994 iha Ano Propedêutico, 1994-1995 estudu Espiritualidade São João Maria Vianey-Dare.
Iha tinan-1995 to’o 1998 kontinua iha Fakuldade Filozofia no Teolojia Universidade Católica, Widya Mandala- Kupang, Indonézia.
Tinan 1999-2001 Ano Pastoral no Semináriu menór de Balide.
Iha tinan 2001-2004 kontinua estudu Teolojia no Instituto Superior de São Alberto Magno Évora-Faculdade de Teolojia da Universidade Católica Portuguesa no tina 2014-2017 estudu iha Licenciado da Teologia Dogmática na Universidade pontifícia Urbaniana – Roma.
Dom Leandro Alves simu ordena sacra hosi tinan-2004 too 2005 nu’udar Pastoral iha Paróquia Turiscai, tinan-2005 simu ordenasaun Diakonál no simu ordenasaun saserdotál iha loron-8 dezembru tinan-2006.
Antes eleitu sai Bispu Dioseze Baucau, Dom Leandro Maria Alves hala’o kna’ar nu’udar Vigáriu Parokiál Katedrál Dili to’o tinan-2007, tinan 2008-2011 sai nu’udar Perfeitu disiplina iha Seminário maior São Pedro e Sao Paulo Fatumeta, Dili.
Tinan 2009-2014 nu’udar diretór da fundasaun São Paulo da Dioseze Dili, tinan 2009-2014 nu’udar Diretór ezekutivu CONECTIL, hosi tinan 2010-2012 sai sekretáriu konsellu presbiteral Diocese de Dili, tinan 2011-2014 reitór semináriu menor Nossa Senhora de Fátima – Dili.
Hosi tinan 2011-2014 eleitu nu’udar Diretór Eskola Sekundária Katólica Nossa Senhora Fátima – Balide, tinan 2017- 2018 sai Vigário Paroquial da Paróquia Catedral de Dili, tinan 2018-2023 asume nu’udar Sekretáriu Ezekutivu konferensia episcopal Timorense (CET).
Tinan-2023 sai padre Paroku Parókia Katedrál, Dili no ikus-mai eleitu ba Bispu Dioseze Baucau iha loron 26 abril 2023 hosi Papa Francisco I no loron 21 jullu tinan 20023, ordenadu nu’udar Bispu Diioseze Baucau.
Jornalista: Sergio da Cruz
Editór: Evaristo Soares Martins
