DILI, 01 setembru 2023 (TATOLI) – Estudante désimu segundu anu husi Eskola Sekundária Tékniku Vokasionál Grupu Otelaria Turizmu (ESTV-GHT) na’in-74 halo aprezentasaun projetu iha Prova Aptidaun Profisionál (PAP). Realizasaun ezame ne’e atu alunu sira demostra kompeténsia iha área ne’ebé mak sira hili.
PAP nia objetivu mak halo ezekusaun no aprezentasaun projetu ida, iha ne’ebé alunu sei hatudu kompeténsia no koñesimentu ne’ebé mak dezenvolve ona durante formasaun, reflete ba tema espesífiku ida.
Projetu ne’e ho karáter investigasaun aplikada, integradora e mobilizadora koñesimentu no kompeténsia ne’ebé hetan durante formasaun dezenvolvidu iha sala aula no iha kontestu traballu. PAP mak komponente ida iha kurríkulu formasaun kursu profisionál sira ho kondisaun atu hetan diploma profisionál.
Prova refere halo ba estudante sira iha kursu haat ne’ebé eziste iha eskola téknika vokasionál mak kulinária, modelajen, kabeleiru no otelaria. Aprezentasaun ne’e la’o ho di’ak no alunu sira hein hodi hakat bá ezame nasionál ne’ebé sei realiza iha outubru.
Diretora ESTV, Saturnina Fernandes, hatete PAP ne’e importante ba estudante sira atu hatudu sira-nian abilidade iha área ne’ebé sira hili no aprende durante tinan tolu nia laran.
Estudante désimu segundu anu ne’ebé rejista iha tinan ne’e hamutuk 80, maibé 74 maka akaba projetu PAP ne’e. Neen la konsege tuir tanba antes ne’e la partisipa iha Formasaun Kontestu Traballu – rua laiha informasaun no haat moras.
Sekretáriu Estadu Edukasaun, Ensinu Sekundáriu no Eskola Téknika, Domingos Lopes Lemos, husu ba inan-aman sira atu fó atensaun ba oan sira, tanba rezultadu ne’ebé sira aprezenta ne’e mai husi preparasaun no esforsu tomak ne’ebé halo durante tinan tolu nia laran.
“Inan-aman sira tenke orgullu ba sira. Karik durante ne’e sira lahatene te’in ka suku, maibé depois sira hetan formasaun durante tinan tolu ohin bele te’in no suku. Ida ne’e maka formasaun abilidade da vida mak ne’e”, esplika.
Governante ne’e salienta katak husi rezultadu sira ne’ebé hatudu, alunu sira sei bá hala’o ida-idak nia negósiu ruma iha li’ur no hetan rendimentu hodi ajuda família nia nesesidade.
ME no INDMO hakarak atribui sertifkadu ba finalista ESTV
Ministériu Edukasaun (ME) no Institutu Nasionál Dezenvolvimentu Mão de Obra (INDMO) hakarak atribui sertifikadu profisionál ba estudante finalista husi ESTV tanba konsidera sira ne’e hetan ona formasaun ida adekuada durante tinan tolu nia laran.
Sekretáriu Estadu Domingos Lemos haktuir katak durante ne’e alunu sira hetan de’it maka diploma no bainhira remata eskola tenke bá tuir fali kursu hodi hetan sertifikadu. “Tinan ida ne’e ita labele implementa, maibé ba tinan 2024 ita tenke implementa duni programa ne’e. Signifika estudante finalista ida bainhira remata nia estudu iha eskola tékniku vokasionál sei hetan diploma inklui mós sertifikadu husi INDMO”, katak.
ME no INDMO deside hodi fó dupla dokumentu formál ba estudante tékniku sira, tanba iha tinan tolu sira hetan formasaun adekuada no iha ona abilidade moris atu apoiu sira-nian profisionalizmu iha área produtiva sira hodi kria rasik postu traballu.
Diretora INDMO, Isabel Fernandes de Lima, haktuir katak eskola ida ne’e hatudu ona sira-nian rezultadu liuhusi aprezentasaun PAP. Rezultadu ne’e hatudu ba INDMO katak apoia sertifikadu ba sira ne’e tuir duni nia dalan.
Nune’e dirijente ne’e husu ba eskola sira atu akompaña alunu sira tuir dezenvolvimentu globál, tanba ko’alia kona-ba profisionalizmu iha buat tolu mak tenke iha maka koñesimentu, abilidade no atitude.
Paulina Lopes Mendonça husi kursu Kostura kontente ho planu atu atribui sertifikadu profisionál ba estudante sira. Maske programa ne’e sei implementa iha tinan oin, maibé ne’e nu’udar progresu ida atu valoriza eskola téknika sira iha futuru.
ESTV-GHT iha totál estudante husi désimu to’o désimu segundu anu hamutuk 252 no iha manorin 35 – permanente 32 no voluntáriu tolu. Eskola ne’e iha sala aula 12 maibé tolu ho kondisaun ladi’ak ona.
“Ita husu ba Ministériu Edukasaun atu hadi’a fali sala tolu ne’ebé maka aat ona, nune’e estudante sira bele uza ba prosesu aprendizajen”, dehan.
Jornalista: Tomé Amado
Editora: Maria Auxiliadora
