DILI, 01 setembru 2023 (TATOLI)-Vise Primeiru-Ministru no Ministru Dezenvolvimentu Rurál no Habitasaun Komunitaria, Mariano Assanami Sabino, hateten daudaun ne’e, governu haree hela atu oinsá halo reforma ba Institutu Públiku (I.P) no Empreza Públika (E.P) ne’ebé mánan saláriu boot maibé laiha produtividade tanba la-rekolla reseita ba kofre Estadu.
“Ita sei haree, tanba ita-nia hakarak halo efisiente liu, efikasia liu ba iha estrutura no funsionáriu atu nune’e orsamentu bele koloka ba programa ne’ebé mak atu halo ba dezenvolvimentu, selae osan gasta liu ba mákina Estadu, duke osan gasta ba programa,” dehan Assanami ba jornalista-sira iha Palasiu Governu, sesta ne’e.
Nia dehan, Antes atu halo reforma ba Instituisaun Públika no Empreza Públika hirak ne’e, Governu sei halo uluk revizaun balun ba funsionamentu instituisaun hirak ne’e nune’e labele fó impaktu ba funsionáriu sira bainhira akontese mudansa ne’e.
Nia argumenta katak durante ne’e, I.P no E.P sira implementa tabela salariál ho montante boot ba funsionáriu sira, tanba ne’e, persiza reforma duni hodi hamenus gastu iha orsamentu jerál Estadu kada tinan.
Entertantu, Governu Konstituisaun dasia, daudaun ne’e, transforma ona Autoridade Nasionál Eletrisidade, Institutu Públiku (ANE,I.P) ba Diresaun ida iha Ministériu Obra Públika (MOP), Servisu Apoiu Sosiedade Sivíl no Auditória Sosiál, Institutu Públiku (SASCAS,I.P, sigla portugués), no Komisaun Reguladora Arte Marsiál, Insitutu públiku (KRAM,I.P) tutela iha Vise Primeiru-Ministru no Ministru Dezenvolvimentu Rurál no Habitasaun Komunitária, Mariano Assanami Sabino, nia okos, no mós Ajensia Nasionál Planeamentu Monitorizasaun no Avaliasaun (ANAPMA) ne’ebé antes ne’e hanesan Insitutu Públiku sai fali Diresaun ida.
Governu mós sei halo tan reforma ba instituisaun sira seluk, tanba daudaun ne’e iha ona prosesu identifikasaun, nune’e hodi kumpre pedidu husi Prezidente Repúblika José Ramos Horta, ne’ebé preokupa ho estabelesementu I.P ho E.P iha Timor-Leste.
“Orientasaun ne’ebé Prezidente Repúblika fó mai Governu, ami sei kumpre implementa saida mak importante, tanba importante liu mak ita tenke efisiente efikasia iha utilizasaun orsamentu, utilizasaun materiál, utilizasaun ema,” nia hateten.
Entretantu, iha reuniaun semanál, PR Horta mós fó hanoin nafatin ba Xefe Ezekutivu atu haree didi’ak kriasaun Institutu Públiku (I.P) no Empreza Públiku (E.P), ne’ebé ninia líder sira simu saláriu boot maibé laiha produtividade serbisu no halo despeza boot ba Estadu. Ho ida-ne’e Xanana subliña katak, IX Governu Konstituisionál sei haree hela orgánika ministériu sira tanba iha mudansa.
“Ko’alia mós kona-ba problema barak ne’ebé ami sei enfrenta, Xefe Estadu bolu atensaun mós bá iha I.P no E.P sira barbarak ho saláriu boot tebes, la halo buat ida,” Xanana salienta.
Jornalista: Hortencio Sanchez
Editór : Agapito dos Santos
