OÉ-CUSSE, 01 setembru 2023 (TATOLI – Kombatente hamutuk na’in-3.947 ne’ebé rejista iha 2009 iha Rejiaun Administrativa Espesiál Oé-Cusse Ambeno (RAEOA), tama ona lista verifikasaun.
Sekretáriu Ezekutivu Konsellu Veteranu Oé-Cusse, Xisto de Sousa ‘Boni-Bel’ informa, dadus rejista iha faze daruak 2009 hamutuk 4.512, mai hosi zona haat.
Primeiru, hosi Zona Pante Makasar A mai hosi suku haat, Costa, Lifau, Taiboko no Nipani hamutuk 883, Zona Pante Makasar B hanesan mai hosi suku haat, Cunha, Lalisuk, Naimeko no Bobokase hamutuk 1030.
Zona Oésilo iha suku tolu, Usitasa’e, Bobometo no Usitaqueno hamutuk 921, Zona Pássabe iha suku rua, Abani ho Malelat hamutuk 401 no Zona Nítibe iha suku lima, Ban-Afi, Lela-Ufe, Usitako, Suni-Ufe no Bene-Ufe hamutuk 1.277.
“Nune’e totál hamutuk 4.512, maibé sira-ne’ebé rejista ona hamutuk 3.947, hela 565 mak sedauk verifika,” nia informa iha Oe-Cusse, sesta ne’e.
Nia informa, verifikasaun dadús veteranu ne’ebé rejista iha 2009, iha Oé-Cusse ita verifika dalarua, primeiru la konsege finaliza daruak mai fali halo verifikasaun tán, dadus hatama ona iha sistema submete hotu ba nasionál,
Maibé nia klarifika, katak ida-ne’e mós sedauk klaru tanba prosesu verifikasaun sei la’o, tuir loloos remata ona maibé ne’e programa nasionál sei hein fali orientasaun bainhira mak kontinua tán.
“Ami simu ona informasaun hosi nasionál katak, ida-ne’e sedauk prosesa tanba verifikasaun sei kontinua, tuir loloos ita remata ona iha 2022, entaun sei kontinua, ami hein de’it, ekipa hosi nasionál kuandu tun mai mak ita kontinua restante sira,” nia katak.
Entretantu, bazea ba livru 3-C Orsamentu Jerál Estadu (OJE) 2023 RAEOA-ZEESM, haktuir benefisiáriu ne’ebé hetan ona apoia osan Estadu iha RAEOA ba kombatente ka veteranu libertasaun nasionál ema na’in-363 no martires libertasaun nasionál ema na’in-223.
Jornalista: Abílio Elo Nini
Editór: Evaristo Soares Martins
