OÉ-CUSSE, 01 setembru 2023 (TATOLI – Sekretáriu Ezekutivu Konsellu Veteranu Rejiaun Administrativa Espesiál Oé-Cusse Ambeno (RAEOA), Xisto de Sousa ‘Boni-Bel’ informa, desde 2014 to’o 2023 ne’e maioria família halot de’it restu mortál sira iha famiília sira nia hela fatin tanba iha Oé-Cusse seidauk iha fatin osuariu atu halo restu mortál sira.
“Restu mortais iha altura ne’ebé ita halo ona nia fatin osuariu iha Palaban, maibé komesa ZEESM tama iha 2014 fatin ne’e halo ba aeroportu, entaun ne’e autoridade maka sobu autoridade mak sei buka fatin ida atu define ba fatin osuariu nian ba Oé-Cusse,” nia dehan iha Oé-Cusse, sesta ne’e.
Nia informa, foin daudaun hosi Governu liuhosi Ministériu Asuntu Kombatente Libertasaun Nasionál (MAKLN), mai husu tán kona-bá restu mortál, maibé Konsellu Veteranu labele halo buat ida tanba fatin laiha.
Tuir nia, durante ne’e komunidade sira hakoi de’it iha fatin ne’ebé besik, hanesan uma, husu misa kari funan iha ida-idak nia fatin de’it, tanba seidauk iha fatin sentru ba haloot restu mortál sira.
“Maibé tuir loloos osuariu ne’e iha munisipíu ida tenki iha, durante ne’e ita seidauk rekolla restu mortál ida tanba osuariu laiha, maske barak hanesan masakare Tumin nian, Maquelab no fatin seluk-tán, maioria família halo iha uma de’it, depois ita hamutuk husu misa no kari ai-funan,” nia katak.
Tan ne’e maka parte Konsellu Veteranu daudaun ne’e konsulta ona Autoridade RAEOA liuhosi Prezidente Autoridade, no hatudu ona fatin sei halo iha Maquelab suku Taiboko, maibé seiduak iha informasaun pozitivu.
“Ami seidauk tuur hamutuk atu deside fatin ne’e, maske ami pronto atu koopera maibé komu laiha oportunidade entaun fatin ba osuariu to’o oras ne’e ita seidauk iha,” nia katak.
Jornalista: Abílio Elo Nini
Editór: Evaristo Soares Martins
