DILI, 01 setembru 2023 (TATOLI)- Membru FALINTIL- Forsa Defeza Timor-Leste (F-FDTL) na’in tolu ne’ebé hetan asidente iha ezersísiu ‘Predator Run 2023’ iha Norte Territoriu Darwin Austrália, agora halo hela kuidadu saúde.
“Akontesimentu ida ne’e iha horibainrua kuarta (30/8). Purtantu, iha akontesimetu ida ne’e, tuir informasaun ne’ebé ami hosi Komandu FDTL simu ona katak ema na’in tolu mak hetan kanek; agora daudaun ne’e tratamentu la’o hela,” Portavós Komandu F-FDTL Kapitaun Mar e Gerra, João Silva, hateten ba jornalista liuhosi konferensia imprensa, iha Kuartel F-FDTL, sesta ne’e.
Nia dehan, membru F-FDTL na’in tolu ne’ebé hetan asidente ne’e maioria hosi Komponente Terestre.
Enkuantu ezersísiu ‘Predator Run’ depende bele to’o semana ida no bele mós to’o semana rua no balun ba fulan ida depende ba durasaun ba ezersísiu.
Ezersísiu ‘Predator Run’
Ezersísiu ‘Predator Run’ iha Norte Territóriu Darwin Austrália, envolve mós forsa armada Timor-Leste no F-FDTL konsidera ezersísiu ida ne’e nu’udar oportunidade dahuluk ba F-FDTL hodi partisipa iha ezersísiu ne’e ho ema na’in 30.
Ezersisiu kombinadu ‘Predator Run’ tinan ne’e envolve militár hosi nasaun sira hanesan Timor-Leste, Indonézia, Filipina inklui nasaun sira seluk iha illa ne’ebé lokaliza iha illa Pásifiku.
Membru F-FDTL na’in tolu ne’e asidente bainhira hala’o treinu kombinadu ‘Predator Run’ ezersísiu ne’ebé prátika ho karreta ne’é mak halo iha Norte Territoriu Darwin no iha asidente ne’e rezulta ofisiál F-FDTL Tenente Juvinal Ribeiro, Kabu Agostinha dos Santos no Soldadu Bartolameu de Souza Nunes mak hetan asidente iha ezersísiu ne’e.
No, hosi element forsa armada timoroan hirak ne’e na’in ida mak hetan kanek grave rua seluk hetan hetan kanek kaman.
Entretantu, Xefe Estadu Maiór Forsa Armada Brigadeiru Jenerál, José da Costa ‘Trix’ dezloka ona ba Darwin, Austrália, hodi haree kondisaun militár sira ne’e.
Jornalista: Natalino Costa
Editór: Rafael Ximenes de A. Belo
