DILI, 01 setembru 2023 (TATOLI)–Primeiru-Ministru (PM), Kay Rala Xanana Gusmão, fó orientasaun ba ministériu tutela atu halo reabilitasaun urjénsia ba rezidénsia médiku kubanu iha Bidau Toko Baru, Dili.
Orientasaun ne’e, Xefe Governu fó hafoin hamutuk ho Ministru Obra Públika, Samuel Marçal, Ministra Saúde, Élia dos Reis Amaral no Ministru Planeamentu Investimentu Estratéjiku, Gastão Francisco de Sousa, tuun direta observa kondisaun rezidénsia ne’ebé hahú a’at ona.
“Ita presiza hadi’a urjénsia para fasilita doutór sira bele hela ho di’ak,” PM Xanana hateten hafoin observa rezidésia iha Bidau, sesta ne’e.
Notísia relevante : Embaixadór Foun Kuba Husu Governu Tau-matan ba Médiku Kubanu
Hatan be orientasaun ne’e, Ministru Obras Publika koordena kedas ho Ministra Élia dos Reis no Ministru Gastão Sousa hodi halo preparasaun ba reabilita iha tempu badak.
Rezidensia ne’ebé harii desde okupasaun Indonézia ne’e, kompostu hosi uma boot tolu, no cobe house rua. Daudaun ne’e ho kondisaun uma kakuluk kalen komesa kuak no plafon dodook hotu ona, inklui morru protesaun haleu uma hahú naksobu hotu.
Dadus hosi brigade médiku kubanu iha Timor-Leste, hosi tinan 2003 to’o 2021, médiku kubanu hamutuk 1.500 resin mak hala’o ona misaun iha Timor, ne’ebé hirak ne’ebé sei ativu hamutuk 160.
Jornalista : Antónia Gusmão
Editora : Julia Chatarina
