PNDS Covalima rekolla ona motorizada 31 hosi funsionáriu kazuál

COVALIMA, 01 setembru 2023 (TATOLI)—Diretór Interinu Programa Nasionál Dezenvolvimentu Suku (PNDS) Covalima, Pedro de Araújo Gomes, simu orientasaun hosi Vise Ministru Administrasaun Estatál (MAE) atu rekola motorizada 31 hosi funsionáriu kazuál iha munisípiu Covalima.

“Ha’u simu orientasaun atu rekolla motorizada hosi funsionáriu kazual no funsionáriu hirak ne’e mós la simu ona saláriu iha fulan-jullu ne’e,” Pedro de Araújo Gomes hateten ba Agência Tatoli, iha nia kna’ar fatin, Sukaer Laran, sesta ne’e.

Bazeia ba despaixu ne’ebé simu, nu’udar diretór interinu tenke kumpre uluk pontu rua hanesan rekolla patrimóniu Estadu no relata progresu ezekusaun orsamentu no progresu fíziku ba nasionál.

Governu orienta atu rekola motorizada tanba funsionáriu kazuál na’in-31 hosi postu administrative histu (7) ne’ebé sira-nia kontrola ramata ona iha fulan-jullu no sira mós la simu ona saláriu tinan ne’e.

Fusionáriu kazuál na’in-31 ne’e, hosi na’in-27 hahú servisu iha tinan 2021 no na’in-haat (4) seluk hahú servisu iha tinan 2019.

Diretór PNDS rekolla ona patrimóniu Estadu kazuál hamutuk na’in-31 ne’ebé hosi postu administrativu sira hanesan kada postu administrativu na’in-tolu (3).

Funsionáriu kazuál 31 ne’e hala’o kna’ar iha postu Zumalai na’in-tolu ne’e tékniku na’in-ida, finansa na’in-ida no sosiál na’in-ida, Fatumea na’in-haat ne’e tékniku rua, sosiál ida no finansa ida, Fohorem na’in-lima ne’e finansa rua, tékniku rua, sosiál ida, Fatululik na’in-tolu ne’e tékniku na’in-ida, sosiál ida no finansa na’in-ida, Tilomar iha na’in-tolu, Maucatar iha na’in-tolu no postu Suai ne’e na’in-ida, enjineiru munisípiu no kontabilista munisípiu.

Funsionáriu kazuál PNDS ne’ebé deskata iha postu administrativu hitu (7) ne’e entrega motorizada iha loron 22 fulan-agustu tinan 2023.

Jornalista : Celestina Teles

Editór        : Cancio Ximenes