iklan

ERMERA

Dezigualdade kontinua limita feto-EhD partisipa iha foti desizaun

Dezigualdade kontinua limita feto-EhD partisipa iha foti desizaun

Feto potensiál iha Covalima partisipa enkontru armonizasaun. Imajen Tatoli/Celestina Teles.

ERMERA, 04 setembru 2023 (TATOLI)—Portavós komunidade Suku Poetete, Higia Xavier Araújo Santos, hateten dezigualdade kontinua limita partisipasaun feto, labarik feto inklui Ema ho Defisiénsia (EhD) bele foti desizaun no bele halo mudansa inkluziva iha Timor-Leste.

“Dezigualidade iha sosiedade sei kontinua limita partisipasaun ativa husi feto no labarik feto ho defisiénsia sai lideransa hodi foti desizaun no vida polítika. Violasaun direitu umanu kontinua afeta ba feto liuliu feto ho defisiénsia sira, tanba implementasaun lei sira seidauk refleta ba nesesidade no seidauk proteje ema ho defisiénsia sira-nia direitu. Ami haree katak implementasaun lei kontra violénsia seidauk bele proteje vítima sira no fó pena ba autór violénsia,” portavós ne’e iha konferénsia imprensa, iha sede suku Poetete, Postu Administrativu Ermera Vila, munisípiu Ermera, segunda ne’e.

Nia dehan, violénsia bazeia ba jéneru hasoru feto, labarik feto no ema ho defisiénsia sira-ne’e ho natureza relasaun família, nune’e nia ba Governu atu bele haforsa implementasaun Lei Violénsia Doméstika hodi proteje vítima sira no penaliza autór violénsia ho natureza relasaun família.

“Ami husu Governu atu kumpre kompromisiu sira-ne’ebé promete ona iha lei no polítika sira, kontribui ba hapara violénsia hasoru feto no labarik feto no ema ho defisiénsia sira,” nia hateten.

Higia hateten, bainhira lei violénsia doméstika implementa no prátika iha baze garante sei hetan seguransa ne’ebé di’ak no ho dignu.

“Ami fiar katak implementa rekomendasaun sira-ne’e, ita-nia maluk vítima sei hetan seguransa ho dignidade inklui proteje sira-nia direitu no sira-nia partisipasaun iha sosiedade. Ami apela ba ema hotu-hotu atu tau-matan no apoiu, tanba violénsia la’ós solusaun. Ita hotu tenke partisipa ativamente hodi hapara violénsia kontra feto no labarik feto ho defisiénsia iha ita-nia komunidade. Komunidade bele sai modelu ba nasaun sira seluk iha kombate kontra aktu violénsia. Ita-hotu nia hakarak mak sai dalan atu hapara violénsia iha ita-nia komunidade no tau matan ba feto no labarik feto no ema ho defisiénsia sira,” nia dehan.

Ema ho Defisiénsia seluk, Bendita Pereira Madeira, hateten Governu presiza haree ba Ema ho Defisiénsia nia moris iha sosiedade ida-ne’e tanba dala barak EhD la fiar no labele sai ba li’ur tanba ema diskrimina sira.

“Komunidade diskrimina ita tanba ho ita-nia kondisaun defisiénsia. Nune’e parte relevante presiza observa kondisaun defisiénsia iha área rurál. Tanba, ami hela iha área rurál sente mesak maibé ho motivasaun no korajen hosi Community Based Rehabilitation Netword Timor-Leste nia apoiu, ami hahú brani hodi ko’alia sai katak ami labarik defisiénsia mós iha direitu hanesan. Tanba ne’e, dala ida tan, Governu tenke tau mós ba prioridade,” nia hateten.

Nia rekomenda ba Governu liuliu Ministériu Solidariedade Sosiál no Inkluzaun (MSSI) mós halo tuir hanesan organizasaun ne’ebé ko’alia kona-ba EhD nian, nune’e EhD labele sente mesak no la sente iha kotuk.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!