DILI, 04 setembru 2023 (TATOLI) –Xefe Estadu-Maior Jenerál FALINTÍL-Forsa Defeza Timor-Leste (F-FDTL), Tenente Jenerál Falur Rate Laek, informa komponente navál iha ona kondisaun no ró atu halo operasaun iha parte norte tasi Timor nian iha futuru.
“Navál nian ne’e agora meiu iha ona atu halo patrulha iha kosteira hosi norte nian, ita-nia ró ahi ida la’o hela, agora sira halo ona teste ikus liu ne’e sira bele halo ona operasaun iha tasi parte norte,” dehan Falur ba jornalista-sira iha Palásiu Prezidensiál Bairro-Pité Dili, segunda ne’e.
Notísia Relevante:Peska Ilegál Prejudika TL Lakon Biliaun Ida Resin
Nia hateten objetivu hosi operasaun ne’e maka atu halo kontrola ho másimu ba atividade peska ilegál ne’ebé oras ne’e la’o maka’as iha tasi Timor nian. Maske F-FDTL seidauk iha fasilidade kompletu, maibé sei uza meiu hotu-hotu atu halo servisu hodi kombate atividade peska ilegál ne’ebé akontese ida territóriu Timor-Leste.
Durante ne’e, Komponente Navál seidauk iha ekipamentu modernu atu oinsá prevene peska ilegál maibé so deteta de’it liuhosi satellite, kuandu ró peska ilegál tama mai área tasi Timor nian.
Aleinde ne’e, antes ne’e, Ministériu Agrikultura no Peska (MAP) halo monitorizasaun liuhosi website ida naran global Fishing world ne’ebé uza hodi deteta ró ilegál sira, maibé website ne’e daudaun ne’e, Indonézia taka ona ba Timor-Leste atu asesu.
Entretantu, liuhosi kooperasaun ne’ebé maka Timor-Leste estabelese ona ho Austália iha área defeza nian maka iha fulan-outobru 2023 nian rohan, Austrália sei fó apoiu ró patrulla Guardian ba Komponente Navál F-FDTL hodi kontrollu ba iha tasi Timor-Leste.
Enkuantu, tuir relatóriu ne’ebé TATOLI asesu husi Komponente Navál katak iha dezembru tinan 2022 liubá liuhosi liuhosi sistema detesaun automátika Skylight ne’ebé Komponente Naval iha, konsege deteta iha ró hamutuk 60 mak halo peska ilegál, iha ita-nia tasi Kosta Súl Timor-Leste. Ró 60 ne’ebé halo atividade peska ilegál hosi nasaun viziñu sira hanesan Thailandia no Vietname.
No mós bazeia ba dadus hosi Ministériu Agrikultura no Peska (MAP), iha tinan 2018 deteta ona ró peska ilegál hamutuk unidade 107 mak tama tasi Timór hodi na’ok ikan ho kuantidade tonelada 223 ne’ebé koverte ba osan karik kuaze millaun $1.
Iha tinan 2019, MAP identifika ró unidade 67 mak tama iha tasi timór halo atividade peska ilegál, ne’ebé ikan lakon hamutuk tonelada 100-resin, konverte ba osan hamutuk $800.000. no dadus totál hosi Ministeriu Agrikultura no Peska (MAP) hahú tinan 2018 to’o 2021 Timor-Leste lakon ona ikan tonelada hamutuk 388.172.
Notísia Relevante:Kada Loron Ró 30 to’o 50 Halo Atividade Peska Ilegál
Jornalista: Hortencio Sanchez
Editór :Agapito dos Santos
