DILI, 04 setembru 2023 (TATOLI)—Ministru Transporte no Komunikasaun, Miguel Marques Gonçalves Manetelu, hateten, Governu hein hela garantia bankária hosi empreza manán-na’in molok avansa ba selebrasaun kontratu projetu kabu submarinu fibra ótika.
“Kona-ba projetu instalasaun ne’e, ninia prosesu la’o ona hein asina kontratu ho empreza RMS (empreza nasionál) no empreza seluk atu halo instalasaun bainhira kabu ne’e dada ona to’o mai Dili. Kontratu ne’e sei selebra dala-ida de’it maibé tanba empreza seidauk hato’o garantia bankária, ne’ebé hein hela, se sira submete ona maka realiza asinatura, tuir loloos asinatura kontratu atu realiza iha loron 10 setembru ne’e,” Ministru informa, segunda ne’e.
Notísia relevante : Governu no empreza ASN selebra kontratu implementa projetu fibra ótika
Empreza Alcatel Submarine Network (ASN) hosi Fransa responsável ba produsaun kabu. Prosesu projetu fibra ótika la’o hela, ne’ebé empreza sei dada fiu hosi tasi-okos no daudaun sira halo hela produsaun kabu hosi tasi-okos iha Fransa.
Antes ne’s, Governu prevee millaun $41 resin hosi verba Fundu Infraestrutura iha proposta lei Orsamentu Jerál Estadu 2021 hodi halo akizisaun ba ekipamentu informátika kabu submarinu.
Nune’e, iha empreza internasionál na’in-20 mak antes ne’e konkorre konkursu públiku internasionál hodi sosa no instala ekipamentu kabu submarinu.
Nune’e, Governu Timor-Leste no empreza ASN asina ona kontratu iha maiu 2022 ba akizisaun no instalasaun ligasaun dijitál iha Timor-Leste, liuhosi kabu submarinu iha sidade Darwin no Port Hedland iha Commonwealth Austrália nian.
Projetu ne’e ho kustu millaun $38,6, ho durasaun serbisu entre 01 jullu 2022 no 31 janeiru 2024.
Jornalista : Antónia Gusmão
Editora : Julia Chatarina
