DILI, 04 setembru 2023 (TATOLI)—Governu liuhosi reuniaun Konsellu Admninistrasaun Fundu Infraestrutura (KAFI) deside suspende provizóriu projetu Arquivo Museu Resisténcia Timorense (AMRT) halo Jardim de Chama Eterna tanba ekipa responsável halo hela analiza dokumentu ne’ebé prevee iha kontratu.
“Agora ami suspende lai, ami analiza didi’ak tiha lai no prosesu hotu ona mak bele kontinua fali,” Ministru Planeamentu no Investimentu Estratéjiku, Gastão Francisco de Sousa, hateten hafoin prezide reuniaun KAFI, iha Ministériu Finansa, Aitarak-laran, segunda ne’e.
Notísia relevante : Jardim da Chama Eterna sei hahú konstrusaun iha fevereiru 2023
Nia dehan, projetu ne’e konsege ezekuta ona maibé bainhira ke’e nia fundasaun, la hanesan ho estudu jeotékniku ne’ebé halo ona.
“Tanba ne’e presiza haree didi’ak tanba ninia implikasaun bele boot bainhira utiliza nafatin métudu ida ne’ebé agora iha,” nia akresenta.
Obra ne’e responsável hosi empreza Star King Construction DMF Acesso, konsórsiu halo supervizasaun hosi konsórsiu Soares no Guterres, ne’ebé tuir planu harii iha Colmera, iha AMRT nia oin.
Obra ne’e harii reprezenta investimentu públiku $5.059.000, ho konstrusaun obra $4.548.000, supervizasaun$351.500, no realizasaun estudu tékniku $160.000.
Bazeia ba kontratu, kontrusaun Jardim da Chama Eterna ne’e sei konklui iha tinan 2024.
Jornalista : Antónia Gusmão
Editora : Julia Chatarina
