DILI, 04 setembru 2023 (TATOLI)- Governu deside ona hodi ezonera Koronél Domingos de Câmara “Amico” hodi lidera Servisu Nasionál (SNI) liuhusi Despaxu Primeiru-ministru, Xanana Gusmão nú. 006/GPM IX/2023.
Durante mandatu, Eis-Diretór Jerál SNI ne’e konta, progresu ne’ebé mak nia halo mak ka’er droga ne’ebé envolve hosi família hosi lider ne’ebé ka’er partidu istóriku nian.
“Tuir lolos ne’e ha’u labele ba bok ida ne’e tanba sira mak fó konfiansa ba ha’u,” eis-kombatente, Koronél Domingos de Câmara hateten, ba jornalista sira iha kna’ar fatin Caicoli, segunda ne’e.
Progresu daruak, tuir nia mak nia parte trava osan ne’ebé mak husi partidu KHUNTO iha Aero Portu ne’ebé mak la’o latuir regra.
“Ha’u la hatene ha’u partidariza saida no saida mak ha’u halo,” Koronél Amico haktuir.
Ba datoluk nian mak kazu ida akontese iha Ministériu Obras Públika nian ne’ebé mak iha lideransa balun Obras Públiku ninian hasai sira hosi sira-nia kna’ar ida ne’e iha relasaun ho partidu PLP, maibé hanesan Diretór Jerál SNI hatudu profisionálizmu hodi halo atuasaun ba kazu ne’e .
No, dahaat mak SNI kordena ho PCIC ba halo apreensaun ba kilat ilegál sira.
“Buat sira ne’e karik ida ne’e mak ha’u nia sala. Ha’u ladun hatene no karik ha’u partidariza PD ho CNRT tanba nia ema ha’u la bok ne’e mak ha’u sala karik. Ha’u la hatene. Maibé partidu rua ne’e nia-ema seidauk halo sala buat ida, ha’u atu bok saida hosi sira nain rua,” nia kompara.
SNI la konsege audiénsia ho PM
Iha biban ne’e, Amico mós triste tanba lakonsege halo audiénsia ho Primeiru Minustru Xanana bainhira simu pose hodi lidera Govenu da-sia.
Tanba momentu ne’e hanesan Diretór Jerál SNI atu hatoo servisu SNI nian ba Xefe Governu ho nune’e mak manda karta ba gabinete Primeiru Ministru maibé laiha resposta.
“Ami komunika atu halo audiénsia ho Primeiru-Minstru, maibé karta ami manda dala haat ba laiha resposta, ami só hasoru malu iha diskusan Orsamentu Retifikativu ne’e de’it” nia haktuir.
Koronél ne’e mós hateten, nia parte ladún konkorda kuandu nia rasik manda karta ba Primeiru-ministru atu husu SNI atu partisipa iha enkontru bilaterál SNI ho nasaun Israel no Singapura, maibé, karta ne’e la’ós PM mak resposta, maibé Ministru Interiór mak resposta fali.
“SNI tutela ba Ministru Interiór ga Primieiru Ministru,” nia kestiona.
Ikusliu, Koronél Amico mós agradese ba funsionáriu SNI tomak ne’ebé durante ne’e fó apoiu másimu hodi halo servisu hanesan Diretór Jerál SNI.
Nia dehan, durante mandatu hanesan DJ SNI nia mós hasai funsionáriu balun tanba kria grupu iha servisu fatin.
“Hanesan sidadaun ita-nia interrese mak ba nasaun no povu laiha tán interrese seluk,” nia hateten.
Simu desizaun Governu
Relasiona ho ezonerasaun, Eis-diretór Jerál SNI, Koronél Domingos de Câmara’Amico’ hateten, simu desizaun IX Governu Konstitusionál ne’ebé ezonera nian hosi kargu Diretór Jerál SNI.
Nia dehan, mandatu ba Diretór Jerál SNI ne’e ba tinan haat, maibé Governu ezonera nia, hanesan sidadaun nia simu.
“Ba ha’u hanesan veteranu, no mós Diretór Jerál SNI nune’e mós hanesan mós sidadaun simu desizaun saida de’it husi Governu no Estadu; Kuandu fó mai, ha’u simu. Buat ida normál. Ba ha’u ne’e normál, tanba saida? nasaun ne’e ba Timoroan hotu hotu ninian,” Koronél Domingos de Câmara hateten.
Nia esplika, bazea ba karta ne’ebé simu iha loron 1 fulan setembru 2023 iha kontéudu karta ne’e dekreve katak ezonerasaun ba funsaun nu’udar Diretór Jerál SNI, no ezonerasaun ne’e akontese tanbá konsidera Diretór SNI partidariza servisu SNI nian.
Tanba ne’e, nia parte dúvida ho ezonerasaun ne’ebé mak Governu halo ba nia hosi nia funsaun hanesan Diretór Jerál SNI nian.
“Só ke buat balun ida ne’ebé mak ha’u mós duvida no pergunta bo’ot ida mai ha’u mak hakerek iha karta ezonerasaun ne’e katak, ezonera hosi SNI ne’e tanba SNI partidariza. Ha’u ladún hatene ha’u nian servisu ne’e, ha’u servi ba partidu saida? ida ne’e mak ha’u ladún hetene. Maibé kualidade hanesan veteranu, ha’u nia partidu mak nasaun,” nia afirma.
“Ba ha’u duvida uituan tanba dehan fali partidariza SNI; ha’u dúvida uituan. Keta atuasaun ruma mak sala karik ha’u ladun hatene. Ha’u mai iha ne’e VIII Governu mak fó konfiansa mai ha’u hodi ha’u mai iha ne’e, ne’ebé ida ne’e hanesan expulsu ida,” nia konsidera.
“Maibé hanesan sidadaun ha’u simu, tanba Govenu laiha ona konfiansa mai ha’u tanba ha’u obriga ha’u atu hela nafatin iha,” nia subliña.
Notísia relevante:Xanana nomeia Longuinhos Monteiro lidera SNI
Jornalista: Natalino Costa
Editór: Rafael Ximenes de A. Belo
