iklan

ERMERA

Rezultadu peskiza CBRN-TL hatudu violénsia hasoru EhD aas iha Ermera

Rezultadu peskiza CBRN-TL hatudu violénsia hasoru EhD aas iha Ermera

Ekipa Community Based Rehabilitation Netword Timor-Leste (CBRN-TL) fó formasaun ba autoridade komunitária no komunidade Poetete ho tema "Haforsa abilidade lideransa iha servisu atendimentu saúde inkluzivu no prevene violénsia bazeia ba jéneru hasoru ema ho defisiénsia iha munisípiu Ermera" iha Ermera, segunda (04 setembru 2023). Imajen Tatoli/Osória Marques.

ERMERA, 04 setembru 2023 (TATOLI)—Diretora Community Based Rehabilitation Netword Timor-Leste (CBRN-TL), Norberta Soares, hateten tuir rezulatdu peskiza no deskobrementu ne’ebé CBRN-TL hatudu katak violénsia bazeia ba jéneru liuliu violénsia hasoru Ema ho Defisiénsia (EhD) aas iha munisípiu Ermera.

Diretora Community Based Rehabilitation Netword Timor-Leste (CBRN-TL) hateten kestaun ne’e iha abertura formasaun ba autoridade komunitária no komunidade Poetete ho tema “Haforsa abilidade lideransa iha servisu atendimentu saúde inkluzivu no prevene violénsia bazeia ba jéneru hasoru ema ho defisiénsia iha munisípiu Ermera” ne’ebé realiza iha suku Poetete-Ermera.

“Tuir ami-nia peskiza no deskobrementu ba violénsia hasoru ema ho defisiénsia aas iha Ermera. Entaun, liuhosi ami-nia formasaun ne’e bele kapasita sira hodi oinsá fó atendimentu, kapasita, partisipa no envolve ema ho defisiénsia iha eventu saida de’it. Ohin ami mai iha ne’e hodi fó formasaun no kapasitasaun ba ita-nia autoridade komunitária no komunidade suku Poetete nian, oinsá bele atende ema ho defisiénsia iha komunidade,” Norberta Soares hateten ba Agência Tatoli iha sede suku Poetete, segunda ne’e.

Hosi formasaun ne’e, nia dehan, autoridade lokál bele lidera tanba buat ne’ebé CBRN-TL identifika ne’e ema moras mentál enfrenta baku, ema ho defisiénsia hetan diskriminsaun no la fó espasu, entaun hosi formasaun ne’e oinsá mak xefe suku bele prevene no responde ba dezafiu ema ho defisiénsia sira-nian.

Organizasaun CBRN-TL hanesan matadalan hodi transmite informasaun, kestaun dezafiu sira hosi ema ho defisiénsia nia lian tatoli ba desizaun na’in sira iha nasionál, nune’e husu autoridade lokál atu kontinua hakbesik aan ba komunidade ema ho defisiénsia atu bele identifika nesesidade espesífiku sira-ne’ebé EhD persiza hodi relata ba iha ministériu kompetente.

Ba organizasaun no rede lokál atu kontinua servisu hamutuk no halo advokásia ba autoridade komunitária hodi implementa loloos polítika Planu Asaun Nasionál ba ema ho defisiésia sira.

Administradór Postu Administrativu Ermera Vila, Alexandre dos Santos, hateten violénsia aas iha Ermera kauza hosi kultura tanba lia-mate no lia-moris no mós eme kaben sedu.

“Atu luta kombate ne’e esforsu koletivu nian. Ita Ermera violénsia aas tanba kauza hosi kultura, kaben sedu, hahan laiha baku malu, hatais laiha baku malu. Entaun kombate ne’e xefe suku sira mak tenke esforsu hodi aviza ba kiik atu partisipa iha formasaun saida de’it mak realiza iha suku to’o munisípiu. Hosi ne’e mak bele kombate, prevene, no bele responde problema komunidade nian liuliu ba ema ho defisiénsia sira,” nia hateten.

Administradór ne’e hatutan, xefe suku sira tenke halo planu no programa hodi bele traxa ba Planu Asaun Nasionál tinan 2024 nian hodi bele hetan formasaun sira hanesan ne’e.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!