iklan

ERMERA

Servisu Saúde Postu Ermera rekoñese seidauk iha fasilidade adekuadu ba EhD

Servisu Saúde Postu Ermera rekoñese seidauk iha fasilidade adekuadu ba EhD

Reprezentante Servisu Saúde Munisipál Ermera, Manuel Soares. Imajen Tatoli/Osória Marques.

ERMERA, 04 setembru 2023 (TATOLI)—Reprezentante Servisu Saúde Munisipál Ermera, Manuel Santos, rekoñese iha postu administrativu Ermera Vila ne’e seidauk iha fasilidade adekuadu ba Ema ho Defisiénsia (EhD) sira.

“Ami rekoñese, loos duni, haree rekursu ne’ebé ami iha menus tebes. Agora iha munisípiu Ermera de’it mós laiha no ami haruka de’it pesoál saúde sira hodi tuir formasaun ba asuntu espesialidade sira, nune’e depois atende ema. Ba oin, ita tau planu hodi aprezenta ba parte relevante,” nia hateten ba Agência Tatoli iha sede suku Poetete, segunda ne’e.

Nia dehan, maske tuir ona formasaun maibé seidauk sufisiente no másimu ba halo atendimentu públiku liga ba ema ho defisiénsia sira, tanba ne’e haforsa abilidade lideransa komunitária ne’e importante tebes ba autoridade hodi bele atende ninia sidadaun iha sosiedade.

Aleinde rekursu umanu, nia hateten, fasilidade asesibilidade ba EhD hanesan rampa no asesu ba haris fatin mós seidauk iha, maibé Servisu Saúde Munisipál Ermera rekoñese ida-ne’e no sei esforsu atu iha futuru tenke iha, nune’e ema ho defisiénsia mós bele iha asesibilidade ba infraestrutura sira.

Tuir dadus ne’ebé Community Based Rehabilitation Netword Timor-Leste (CBRN-TL) katak 96% seidauk iha profisionál saúde ba servisu espesializada hanesan fisioterapia, terapia no seluk tan no iha 91% seidauk iha profisional saúde ne’ebé fó atendimentu ba ema ho defisiénsia tilun ho matan nian iha Ermera.

Dadus hatudu, iha 79% ne’e laiha instalasaun kuandu siná ba informasaun no 69%, laiha informasaun ne’ebé disponível ba defisiénsia tilun ho matan hodi asesu.

“Dezafiu espesífiku ba ema ho defisiénsia kontinua hasoru bainhira asesu ba servisu saúde. Tanba distánsia dook hosi no laiha orsamentu ba transporte, ida-ne’e 50%, dezafiu seluk mak barreira atetude (15%) no 11% aimoruk menus,” diretora CBRN-TL, Norberta Soares, hateten.

Tanba ne’e, nia rekomenda ba Ministériu Saúde atu prioriza ba asisténsia saúde mentál iha postu administrativu hodi implementa prioridade bazeia ba Planu Asaun Nasionál Saúde nian.

“Presiza iha saúde mentál entaun harii no reabilita instalasaun postu saúde no sentru saúde ho asesivel no ekipamentu ne’ebé adekuadu hanesan rampa, sala rejistu, sala partu inklui toilet, kuadru informasaun, kadeira roda, ai-tonka no fornese kapasitasaun espesífiku no konsistente ba profisionál saúde iha nivel postu no suku, kona-ba atendimentu saúde inkluzivu no atendimentu servisu esposializada terapia no fisioterapia,” nia hateten.

Reprezentante Ema ho Defisiénsia (EhD), Bendita Pereira Madeira, rekomenda ba Governu atu tau atensaun ba fasilidade ba EhD iha fatin públiku.

“Ha’u hakarak rekomenda ba Governu ajuda tau rampa iha fatin públiku, liuliu instituisaun públiku no haris fatin sira iha públiku, tanba ami uza kadeira roda no uza ai-tonka labele asesu. Ba ami defisiénsia ne’e importante mak iha asesibilidade iha fatin públiku,” nia rekomenda.

Administradór postu administrativu Ermera Vila, munisípiu Ermera, Alexandre dos Santos, prontu kolabora no halo proposta ba parte relevante hodi bele tau ba prioridade ba Ema ho Defisiénsia (EhD), nune’e sira mós bele asesu ba fasilidade ne’ebé adekuadu.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!