Assanami partisipa eventu festivál kulturál Xina
DILI, 05 setembru 2023 (TATOLI) – Primeiru-Ministru Interinu, Mariano Assanami Sabino, partisipa iha eventu Festivál Kulturál Xina iha Timor-Leste, ne’ebé realiza iha Kampus IOB, Fomentu, tersa kalan.
Objetivu hosi festivál ne’e atu promove kulturál Xineza hodi reforsa kulturál Timor-Leste nian atu bele eziste multi kulturál iha ne’e.
“Ita hotu mai husi étniku oinoin, balun mai hosi Xina, Arabe no seluk tan, maibé ita mai ona iha illa ida ne’e ita sai ona povu timorense, entaun kultura Xines ne’ebé ohin ita selebra ne’e parte ida hosi konstrusaun nasaun ne’ebé bele reforsa liutan povu Timor-Leste ho nia kulturá, tradisaun no lisan”, Assanami fó sai liuhosi nia nia intervensaun.
Tanba ne’e, lori Governu nia naran hakarak apresia ba Reitór IOB ho nia estrutura bele realiza eventu ne’e iha sira nia fatin.
“Governu mós sei apoiu tomak formasaun lian mandarin, horseik ami ko’alia ona ho Assosiasaun Komérsiu Komunidade Timor Oan, ba oin bele haree, tanba ne’e língua komérsiu ne’ebé importante no ohin nasaun barak uza iha mundu”, nia afirma.
Timor-Leste rekoñese Xina hanesan nasaun maun alin, tanba sira mak fó apoiu másimu uluk ba Timor-Leste nia independénsia ne’ebé proklama iha 1975.
“Sira-nia konsisténsia iha Konsellu Seguransa ONU ne’ebé mak sempre fó apoiu ba rezolusaun hotuhotu ne’ebé fó dalan ba auto determinasaun Timor-Leste nian nudar nasaun ida”, nia revela.
Xina nu’udar nasaun solidariedade antigu ne’ebé ohin loron sei kontinua apoiu Timor-Leste nia dezenvolvimentu tuir vizaun Prezidente Xina, XI JINPING, kona-ba one belt, one road ne’ebé la’o ona iha fatin barak, maske Timor-Leste ho dezafius maibé oinsá lao hamutuk ba paradise foun iha futuru.
“Lori Primeiru-Ministru hakarak fó parabéns ba Xineza timorense no Xineza sira ne’ebé foin mai, kulturá ne’e la’os ba povu Xinez timorense nian de’it, maibé sai ona parte integradu husi kulturá Timor no ohin ba oin ne’e sai ona rikusoin ne’ebé integra ba prosesu konstrusaun nasaun, ho eventu hanesan ne’e sei hametin liután ita-nia koezaun sosiál”, nia hakotu.
Jornalista: Hortencio Sanchez
Editór : Zezito Silva
